काठमाडौं, ११ माघ । बलिउड सुपर स्टार सलमान खान आगामी फागुन २६ गते काठमाडौंको टुँडिखेलमा हुने कार्यक्रममा सहभागी हुन नेपाल आउने पक्का भएको छ ।

कार्यक्रममा सलमानसँगै बलिउडका अन्य कलाकारहरु पनि आउने आयोजक ओडीसी इन्टरटेनमेन्टले जानकारी दिएको छ । जेट एयरलाइन्सको विमानबाट खान २५ गते काठमाडौं आइपुग्ने छन् ।

सात जना कलाकारका साथमा ९० जनाको टोली होटल सोल्टीमा बस्ने बताइएको छ । सलमान जम्मा तीन दिन नेपाल बस्नेछन् ।

सलमानसँगै कार्यक्रममा नायिका सोनाक्षी सिन्हा, निर्देशक प्रभु देवा, डेजी शाह, कृति सेनोन र पञ्जाबी भाँगडा डान्सर ‘मिड बोस’ पनि आउने आयोजकले जनाएको छ ।

सलमान आउने पक्का भएपछि प्रचार प्रसार सुरु गरेको ओडीसी इन्टरटेनमेन्टका सिमान्त गुरुङले जानकारी दिनुभयो । कार्यक्रम हेर्न टिकट काट्नुपर्ने गुरुङले बताउनुभयो । उहाँका अनुसार कार्यक्रम हेर्ने ठाउँअनुसार टिकट दर फरक फरक तोकिएको छ ।

खानलाई १५ सयभन्दा धेरै सुरक्षाकर्मीले कार्यक्रमस्थलमा सुरक्षा दिने , ५ सय प्राइभेट सुरक्षाकर्मी परिचालन गरिने र ४ सयजना स्वयंसेवकले कार्यक्रमलाई व्यवबस्थित गर्नेछन् ।

कार्यक्रमको टिकट ग्लोबल आईएमई बैंकबाट पाइने छ । टिकट ३ हजार, ५ हजार र १० हजार दरका हुनेछन् । सलमान सन् १९९४ पछि दोस्रो पल्ट नेपाल आउन लागेका हुन् ।