काठमाडौं, २८ भदौ । बागमती प्रदेशमा हुने संघीय र प्रादेशिक निर्वाचन सबैको आकर्षणको केन्द्र बनेको छ । नेकपा माओवादी केन्द्रका अध्यक्ष पुष्पकमल दाहाल प्रचण्ड, एकीकृत समाजवादीका अध्यक्ष माधवकुमार नेपाल, नेपाली कांग्रेसका महामन्त्री गगनकुमार थापा लगायतका अधिकांश शीर्ष एवम् प्रभावशाली नेताहरु बागमती प्रदेशबाट प्रतिनिधित्व गर्छन् । प्रमुख प्रतिपक्षी दल नेकपा एमालेका वरिष्ठ नेता ईश्वर पोखरेलदेखि नयाँ पार्टी राप्रपा नोल गठन गरेका कमल थापा यही प्रदशमार्फत आगामी निर्वाचनमा लड्दैछन् ।
बागमती प्रदेश अन्तर्गत सिन्धुलीका हालका सांसद हरिबोल गजुरेल नेकपा माओवादी केन्द्रबाट समानुपातिकमा सिफारिस भए । माओवादीले सिन्धुलीको प्रत्यक्षतर्फ राजन दाहालको नाम सिफारिस गरिएको छ । दोलखाबाट नेपाली कांग्रेसले जिल्ला सभापति बर्मा लामासहित हालका सांसद जीपछिरिङ लामा, कुन्दनराज काफ्ले, अजयबाबु शिवाकोटी, उद्वव काफ्ले गरी जम्मा ११ जना नेताहरुको नाम सिफारिस छन् । दोलखाको प्रत्यक्षतर्फ एमालेले हालका सांसद पार्वत गुरुङसहित, आनन्द पोखरेल, सरस्वती बस्नेत, रचना खड्का, ईश्वर पोखरेल, शान्ती पाख्रिन, श्याम बस्नेत र भरत दुलाल गरी ८ जनाको नाम सिफारिस छ । २०७४ को संघीय निर्वाचनमा एमाले सांसद गुरुङले देशैभरमा सबैभन्दा बढी अर्थात् ३० हजार मतान्तरले विजयी बनेका थिए ।
नेकपा माओवादी केन्द्रका अध्यक्ष पुष्पकमल दाहाल प्रचण्ड चितवन क्षेत्र नं. ३ बाट सर्वसम्मत सिफारिस भएका छन् । अध्यक्ष प्रचण्डको नाम गोरखा १ बाट पनि सिफारिस भएपनि उनले चितवनबाटै चुनाव लड्ने बताउदै आएका थिए । चितवन १ मा एमालेले पूर्व अर्थमन्त्री समेत रहेका सुरेन्द्र पाण्डेको नाम सिफारिस गरेको छ । कांग्रेसका सांसद एवम् महिला, बालबालिका तथा ज्येष्ठ नागरिक मन्त्री उमा रेग्मीको निर्वाचन क्षेत्र पनि चितवन हो । एमालेको भक्तपुर २ बाट महेश बस्नेत चुनावी मैदानमा छन् । भक्तपुर १ मा नेपाल मजदुर किसान पार्टीका प्रेम सुवाल र नेकपा एकीकृत समाजवादीका डा. राजेन्द्र कोजूबीच प्रतिस्पर्धा हुने आंकलन गरिएको छ । नेपाली कांग्रेसका महामन्त्री काठमाडौं ४ बाट सिफारिस भएका छन् ।
कांग्रेसको काठमाडौं १ बाट प्रकशमान सिंह, काठमाडौं २ मा लोकेश ढकाल, दीपक कुइँकेल र प्रतिमा गौतम, काठमाडौं ३ बाट अम्बिका बस्नेत, सन्तोष चालिसे, काठमाडौं ५ बाट प्रवक्ता समेत रहेका डा. प्रकाशशरण महत चुनावमा लड्दैछन् । यसैगरी, काठमाडौं ६ बाट भीमसेनदास प्रधान, काठमाडौं ८ मा राजुराज जोशी, काठमाडौं ९ मा ध्यानगोविन्द रञ्जित, तीर्थराम डंगोल र काठमाडौं १० मा राजन केसीको नाम सिफारिस छन् । प्रमुख प्रतिपक्षी दल नेकपा एमालेले काठमाडौं १ मा विदुर मैनाली, रुपनारायण श्रेष्ठ , टीकाराम भट्टराई, काठमाडौं २ मा मणिराम फुयाँल, काठमाडौं ३ मा कृष्ण राई, काठमाडौं ४ मा डा. राजन भट्टराई, काठमाडौं ५ मा वरिष्ठ उपाध्यक्ष ईश्वर पोखरेल, काठमाडौं ६ मा योगेन्द्र संग्रौला, लेखनाथ फुँयालसहित ५ जना, काठमाडौं ७ मा रघुजी पन्त, विद्यासुन्दर शाक्य, बीपी ढकालसहित ५ जना, काठमाडौं ८ मा राजेश शाक्य, काठमाडौं ९ मा कृष्णगोपाल श्रेष्ठ, अजयक्रान्ती शाक्य र काठमाडौं १० मा विनोद श्रेष्ठ, सुरेन्द्र महर्जन लगायत ६ जनाको नाम सिफारिस छन् । एमाले नेता गोकुल बास्कोटा काभ्रे २ बाट चुनाव लड्दैछन् । सांसद नवराज सिलवाल ललितपुर क्षेत्र नंं. १ बाट सर्वसम्मत सिफारिस छन् ।
एमालेको सिन्धुपाल्चोक २ मा प्रत्यक्षतर्फ पूर्वमन्त्री शेरबहादुर तामाङ, हस्त पण्डित र माधव पाण्डेको नाम सिफारिस भएको छ । एकीकृत समाजवादीका अध्यक्ष माधवकुमार नेपाल रौतहटको क्षेत्र नम्बर १ बाट चुनाव लड्दैछन् । २०७४ मा उनी काठमाडौंबाट चुनवा लडेका थिए । ऊर्जा, जलश्रोत तथा सिँचाईमन्त्री पम्फा भुषाल यसअघि ललितपुर ३ बाट चुनाव जितेका थिए । भूमि, व्यवस्था सहकारी तथा गरिबी निवारण मन्त्री शशी श्रेष्ठ पनि बागमती प्रदेशबाटै प्रतिनिधित्व गर्छन् ।
राष्ट्रिय प्रजातन्त्र पार्टीमा लामो समयसम्म अध्यक्ष रहेका कमल थापा नयाँ एजेण्डासहित राप्रपा नेपाल पार्टी गठन गरेका छन् र उनी यो पटक मकवानपुर क्षेत्र नं. १ बाट एकल उम्मेदवार छन् । २०७४ को चुनावमा एमाले र माओवादीबीच वाम गठबन्धन भएको थियो । तर, एमाले विभाजनको असर यो पटक बागमती प्रदेशमा पर्ने अनुमान गरिएको छ । त्यसो त, यो पटक राप्रपा, जसपा लगायतका दलहरुपनि विभाजनपछि संघीय निर्वाचनमा प्रतिस्पर्धा गर्दैछन् । देशको संघीय राजधानी काठमाडौं उपत्यकासहित बागमती प्रदेशमा हुन गइरहेको संघीय निर्वाचनलाई निकै महत्वका साथ हेरिएको छ ।
प्रतिक्रिया दिनुहोस्