काठमाडौं, २६ भदौ । निलम्बित प्रधानन्यायाधीश चोलेन्द्र शमशेर जबराले दीपक कार्कीलाई प्रधानन्यायाधीश बनाए महाभियोग फिर्ता लिने भनेर कांग्रेस नेता भेट्न आएको बताएका छन्।

उनले आइतबार बसेको महाभियोग समितिको बैठकमा बोल्दै कांग्रेसकी डिना उपाध्याय आफ्नो क्वाटरमा आएको बताए।

‘राजीनामा दिने हो भने हामी सहजीकरण गर्छौं। महाभियोग फिर्ता लिन्छौं। एक डेढ महिना तपाईं काम गर्नुस् त्यसपछि दीपकलाई दिनुस् भनेर राजनीतिक पार्टीका शीर्ष नेताले भनेका हुन्,’ उनले बयानमा भने, ‘को नेताले भनेको हो म त्यो पनि भन्दिन्छु।’

यसरी भनेपछि उनलाई त्यहाँ उपस्थितले नाम भन्न सुझाव दिएपछि डिना उपाध्यायको नाम लिएका हुन्। ‘नेपाली कांग्रेसकी डिनाजीलाई सोधे हुन्छ। उहाँ मकहाँ आउनुभएको हो। यसमा मैले प्रचण्डजी र शेरबहादुरजीसँग सल्लाह गरेर तपाईसँग कुरा गर्न आएको हो, यसलाई हामी फिर्ता लिइदिन्छौं। मिलाएर राजीनामा दिइदिए हुन्थ्यो भन्नुभएको हो,’ उनले भने, ‘उहाँलाई सोध्दा हुन्छ। मेरै क्वाटरमा आएर भन्नुभएको हो।’