काठमाडौ, २४ भदौ । कर्णाली प्रदेशमा आगामी निर्वाचनको गतिविधि तीव्र बनेको छ । २०७४ को निर्वाचनमा वामपन्थी दलहरुको वर्चस्व रहेको कर्णाली प्रदेश यसपटक सत्ता गठबन्धनको पक्षमा नतिजा आउने आंकलन गर्न सकिन्छ । यस प्रदेशमा सत्ता साझेदार दल नेकपा माओवादी केन्द्रको प्रभाव रहँदै आएको छ ।

वर्तमान अर्थन्त्री जनार्दन शर्मा, शक्ति बहादुर बस्नेत, दुर्गा बहादुर रावत लगायतका नेताहरु कर्णाली प्रदेश अन्तर्गत चुनावी मैदानमा छन् ।नेकपा माओवादी केन्द्रका अध्यक्ष पुष्पकमल दाहाल प्रचण्ड निर्वाचनका सन्दर्भमा विभिन्न जिल्ला तथा प्रदेशको चुनावी कार्यक्रममा छन् । यसैक्रममा, उनी पछिल्लो समय अर्थमन्त्री जनार्दन शर्मासहित कर्णाली प्रदेशका विभिन्न जिल्लाहरुमा चुनावी सभामा पार्टी र गठबन्धनको पक्षमा नतिजा आउनेगरी अगाडि बढ्न निर्देशन समेत दिए । त्यसो त, उनले सबै चुनावी कोणसभा, प्रशिक्षण कार्यक्रमहरुमा २०६४ सालको जस्तै नतिजा ल्याउनेगरी संगठनात्मक गतिविधि चुस्तदुरुस्त पार्न नेताकार्यकर्तामा आव्हान गर्दै आएका छन् ।

सल्यानमा संघीय सासदतर्फ हालका प्रतिनिधिसभा सांसद टेकबहादुर बस्नेत र अध्यक्ष प्रचण्डका स्वकिय सचिव रमेश मल्ल सिफारिस भएका छन् । सल्यानको समानुपातिकतर्फ दिलमाया बुढा मगर, कमल विक र रत्नबहादुर वलीको नाम सिफारिस भएको छ । त्यस्तै नेकपा एकीकृत समाजवादीले डोल्पाबाट हाल सांसद रहेका धनबहादुर विष्टको नाम सिफारिस छ । पूर्वगृहमन्त्री शक्तिबहादुर बस्नेतको गृहजिल्ला जाजरकोटमा यसअघि माओवादी केन्द्र बलियो छ । माओवादी र समाजवादी मिलेपनि उनीहरुको पक्ष यस क्षेत्रमा नतिजा आउने देखिन्छ ।

प्रमुख प्रतिपक्षी दल नेकपा एमालेले कालीकोटमा नागिन्द्र शाही र हुम्लामा दल रावल संघीय निर्वाचनका लागि एकल उम्मेदवार सिफारिस गरेको छ । गठबन्धनमार्फत चुनाव लड्दा गएको स्थानीय निर्वाचनमा नेपाली कांग्रेसले राम्रो नतिजा ल्यायो । कांग्रेस नेता राजीवविक्रम शाहले अबको निर्वाचनमा कर्णालीमा कांग्रेसको बलियो उपस्थिती रहनुपर्ने बताए ।

हालका मुख्यमन्त्री समेत रहेका जीवनबहादुर शाही, महेन्द्र बहादुर शाही लगायतका नेताहरु कर्णाली प्रदेशको प्रतिनिधित्व गर्दछन् । माओवादी केन्द्र, एकीकृत समाजवादी र नेकपा एमाले लगायत वाम दलहरुको वर्चस्व रहेको कर्णालीमा वाम–लोकतान्त्रिक गठबन्धन हुँदा परिणाम रोचक आउने अनुमान गरिएको छ । गठबन्धन प्रभावकारी हुन नसकेपनि वामपन्थी झुकाव रहेका दलको पक्षमा परिणाम आउने अहिलेसम्मको नतिजाले देखाउछ ।