बागलुङ, २३ भदौ । बागलुङ नगरपालिका ११ तल्लो रामतोलामा पहिरो खस्दा दर्जनभन्दा बढी घर जोखिममा परेका छन् । सयौं रोपनी जमिनको सुन्तला खेती, अन्य अन्नपातसमेत बग्न थालेको वडाध्यक्ष ज्ञानेन्द्र गौतमले बताए । उनका अनुसार केही दिनदेखि जमिन चर्केकोमा बुधबार बिहानदेखि पहिरो चल्न थालेको हो ।

पहिरोले सडक र जंगल तथा पीपलको चौतारो समेत बगेपछि गाउँभरी त्रास फैलिएको छ । यहाँका ५० घरमा खानेपानी अभाव भएको छ । पोल ढलेकोले आसपासका अन्य घरमा समेत बिजुली अवरुद्ध भएको गौतमले जनाए ।उक्त पहिरोले स्थानीय कुलराज शर्मासहित दर्जनबढी घरपरिवार विस्थापित भएका छन् । केही घर परिवार सुरक्षित ठाउँको खोजीमा रहेको स्थानीय विष्णु पौडेलले जानकारी दिए । जमिन चिरा परेको स्थान हेर्दा थप सयौं रोपनी जमिन, घर तथा सडक बग्ने अबस्थामा रहेको देखिएको उनले बताए ।

पहिरोले यहाँको तमाखुबारी भन्ने अर्को बस्तीमा पनि जोखिम बढेको छ । ‘यो संकेत हेर्दा यहाँको बस्ती नै जोखिम भयो, अब धेरै घरहरु विस्थापित हुने भए,’ पौडेलले भने, ‘कतै रोकथाम गर्ने अवस्था नै छैन ।’ हरेक बारीका पाटामा कुखुराले खोस्रेझै खाल्डा पर्ने र चिरा पर्दै बग्ने गरेको उनले बताए । बगेको पहिरोले जैमिनी नगरपालिका १ को ओडार भन्ने स्थानमा पनि जोखिम बढेको छ । केही स्थानमा क्षति भइसकेको छ । रामतोलादेखि तल्लो खण्ड जैमिनी नगरपालिका १ मा पर्छ ।केही दिनदेखिको वर्षात्‌ले थप पहिरो खसेको इन्जिनियर त्रिलोचन गिरीले जानकारी दिए ।

‘तत्काल कुनै पनि उपायले पहिरो रोक्न सकिने अवस्था छैन,’ गिरीले भने, ‘यो अनौठो तरिकारले सिंगो पहाड खस्ने अवस्था भयो ।’ जोखिम भएको स्थानमात्र नभई अन्य गाउँबासीसमेत डराउन थालेको उनले बताए । यहाँका ढालनाथ शर्मा, कुलराज शर्मा, बीरबहादुर केसी, भूमिश्वर शर्मा, मीनबहादुर केसी र दिलबहादुर केसीको घर भने स्थानीयले मंगलबार र बुधबार गरी खाली गराएका छन् ।