काठमाडौं, २२ भदौ । आगामी संघीय निर्वाचनमा प्रदेश १ बाट विभिन्न शीर्षस्थ नेताहरु होमिदै छन् । सत्ता गठबन्धन अन्तर्गत परराष्ट्रमन्त्री रहेका डा. नारायण खड्कादेखि, स्वास्थ्य तथा जनसंख्या मन्त्री रहेका भवानी खापुङ, माओवादी केन्द्रका राम कार्की, सुदन किराँती लगायतका नेताहरु बलियो दाबेदारका रुपमा छन् । प्रदेश १ अन्तर्गत समाजवादीका सम्मानित नेता झलनाथ खनालदेखि प्रतिपक्षी नेकपा एमाले अध्यक्ष केपी शर्मा ओली लगायतका नेताहरु आगामी निर्वाचनको तयारीमा जुटेका छन् ।
प्रदेश १ मा उदयपुरको निर्वाचन क्षेत्र १ का लागि परराष्ट्रमन्त्री तथा नेपाली कांग्रेसका केन्द्रीय सदस्य डा. नारायण खड्कासहित प्रत्यक्षतर्फ आठ जनाको नाम सिफारिस भएको छ । २०७४ को निर्वाचन परिणाम अनुसार उदयपुरमा कांग्रेस र माओवादी बलियो देखिन्छ । सञ्चार तथा सूचना प्रविभि मन्त्री एवम् कांग्रेस नेता ज्ञानेन्द्र बहादुर कार्की सुनसरीको क्षेत्र नम्बर ४ बाट प्रतिनिधिसभा सांसदका लागि एकल उम्मेदवार सिफारिस भएका छन् । कांग्रेस महामन्त्री विश्वप्रकाश शर्मा झापा १ बाट सर्वसम्मत उम्मेवार सिफारिस भए । यसअघि झापा १ मा माओवादी केन्द्रका राम कार्कीले शर्मालाई पराजित गरेका थिए । कार्की भने यस पटक ओखलढुंगाबाट चुनाव लड्दैछन् । कांग्रेसका पूर्व महामन्त्री कृष्ण सिटौला भने झापा ३ बाट एकल उम्मेदवार छन् । सत्ता गठबन्धनका नेताहरुबीच निर्वाचन क्षेत्रमा थप सहमति जुटाउने क्रम जारी छ ।
एक मात्र निर्वाचन क्षेत्र रहेको पाँचथरमा एमालेले वसन्त कुमार नेम्वाङ सर्वसम्मत सिफारिस गरेको छ । एमालेको इलाम १ बाट महेश बस्नेत, इलाम २ बाट सुवास नेम्वाङ संघीय सांसदका उम्मेदवार छन् । नेकपा एकीकृत समाजवादीका सम्मनित नेता झलनाथ खनाल इलाम १ बाट उम्मेदवार सिफारिस छन् । ताप्जेलुङमा माओवादी केन्द्रबाट प्रत्यक्षतर्फ खेलप्रसाद बुढाक्षेत्री, मिङ्माडण्डु शेर्पा र लक्ष्मीप्रसाद अन्छङबोको नाम सिफारिस गरेको छ । कांग्रेसले मोरङ २ बाट प्रतिनिधिसभाको प्रत्यक्षतर्फ डा. मिनेन्द्र रिजाल र सुजता कोइरालाको नाम सिफारिस गरेको छ । बाइट…
सुनसरी १ मा प्रत्यक्षतर्फ कांग्रेसले मीन विश्वकर्मासहित ५ जनाको नाम सिफारिस गरेको छ भने यो क्षेत्रमा एमालेले जयकुमार राईको एकल नाम सिफारिस छ । प्रमुख प्रतिपक्षी नेकपा एमाले अध्यक्ष झापा ५ बाट उम्मेदवार छन् । एमालेले झापा १ मा रविन कोइराला उम्मेदवार सिफारिस गरेको छ । राष्ट्रिय प्रजातन्त्र पार्टीले झापाको चार वटा क्षेत्रमा उम्मेदवार तय गरेको छ । राप्रपा अध्यक्ष राजेन्द्र लिङ्देन झापा ३ बाट लड्दैछन् । राप्रपाले ओलीको क्षेत्रमा उम्मेदवार तय गरेको छैन ।
एमालेले मोरङ २ मा ऋषिकेश पोखरेल, मोरङ ३ मा भानुभक्त ढकाल, मोरङ ४ मा विनोद ढकाल र मोरङ ५ मा योगी मण्डल उम्मेदवार तय गरेको छ । यसैगरी, सुनसरी ३ मा भगवती चौधरी, झापा ४ मा एलपी साँवा लिम्बु, सोलुखुम्बुमा मानवीर राई उम्मेदवार तय गरेको छ । प्रदेश १ का १४ जिल्ला र त्यसका निर्वाचन क्षेत्रहरुमध्ये दलहरुले उम्मेदवार सिफारिस गर्ने क्रम जारी छ । यस प्रदेश अन्तर्गत हेबीवेटका नेताहरुबीच तीव्र प्रतिस्पर्धा हुँदैछ ।
प्रतिक्रिया दिनुहोस्