काठमाडौं, ३० असार । श्रीलंकाका राष्ट्रपति गोताबाय राजपाक्षले अहिलेसम्म आफ्नो पदबाट राजीनामा दिएका छैनन्। उनले यसअघि बुधबार राजीनामा दिने घोषणा गरेका थिए। तर,म्याद सकिनुभन्दा एक दिनअघि नै उनी माल्दिभ्स भागेका थिए। राजपाक्षको अनुपस्थितिमा प्रधानमन्त्री रनिल विक्रमासिङ्घेलाई कार्यवाहक राष्ट्रपति बनाइएको अन्तर्राष्ट्रिय सञ्चारमाध्यमहरुले उल्लेख गरेका छन्। तर, विपक्षीहरुले भने विक्रमासिंघेको नियुक्तिमा प्रश्न उठाएका छन्।
विपक्षी दलका तर्फबाट राष्ट्रपतिका उम्मेदवार सजित प्रेमदासले विक्रमासिंघेलाई कार्यवाहक राष्ट्रपतिमा नियुक्तिलाई तमासाको संज्ञा दिएका छन्।
उनले पहिले एक सिटका सांसदलाई देशको प्रधानमन्त्री बनाएर अहिले सोही व्यक्तिलाई कार्यवाहक राष्ट्रपति बनाइएको बताए। सजिथ प्रेमदासाले यो लोकतन्त्रको राजपाक्ष शैली भएको बताए। विक्रमासिङ्घेले श्रीलंकाको अवस्थालाई सम्हाल्न सेना र प्रहरीलाई निर्देशन दिएका छन्। बुधबार राति टेलिभिजन सम्बोधन गर्दै उनले प्रदर्शनकारीलाई प्रधानमन्त्री कार्यालय र राष्ट्रपति भवन छाड्न अपिल पनि गरेका छन्।विक्रमासिंघेले भने, “हामी संविधानको अवहेलना गर्न सक्दैनौं। हामी फासीवादीहरूलाई देश दिन सक्दैनौं। हामीले लोकतन्त्रमाथिको यो फासीवादी खतरालाई अन्त्य गर्नुपर्छ।”प्रदर्शनकारीले बुधबार प्रधानमन्त्रीको कार्यालय कब्जा गरेका थिए। यसअघि उनीहरुले राष्ट्रपति भवन पनि कब्जा गरेका थिए। राजपाक्षले बुधबार देश छोडेको खबर आएपछि कोलम्बोमा प्रदर्शनकारी थप आक्रोशित बनेका थिए। श्रीलंकामा बुधबार रातिदेखि कर्फ्यु लगाइएको छ।
प्रतिक्रिया दिनुहोस्