काठमाडौं, १० असार । काठमाडौं उपत्यकासहित आसपासका क्षेत्रमा पछिल्लो चार घण्टादेखि भारी वर्षा भएको छ । वर्षाका कारण नदीहरूमा जलसतह बढेको छ । अधिकांश नदीमा बाढी आएको छ । हनुमन्ते, मनोहरा, बागमती र यसका सहायक नदीमा जलसतह बढ्दो क्रममा रहेकोले नदी किनारको बाटो भई यात्रा गर्दा उच्च सतर्कता अपनाउन जल तथा मौसम विज्ञान विभागको बाढी सूचना केन्द्रले आग्रह गरेको छ । आगामी ३ घण्टासम्म उच्च सतर्कता अपनाउन भन्दै केन्द्रले चेतावनी सन्देश जारी गरेको हो । पछिल्लो चार घण्टामा काठमाडौं उपत्यकाको धेरै स्थानमा भारी वर्षा मापन भएको छ । हनुमन्ते, मनोहरा, बागमती र यसका सहायक नदीमा जलसतह बढ्दो छ, नदी किनारको बाटो भई यात्रा गर्दा अर्को तीन घण्टा उच्च सतर्कता अपनाऔँ, केन्द्रले भनेको छ ।
काठमाडौंबाहेकका क्षेत्रमा पनि आज वर्षाको सम्भावना छ । देशका अधिकांश स्थानमा वर्षा हुने भएकोले नदी तटीय क्षेत्रका बासिन्दालाई सतर्क रहन आग्रह गरिएको छ । मौसम पूर्वानुमान महाशाखाले केही स्थानमा हल्का तथा मध्यम र केहीमा भारी वर्षा हुन सक्ने आकलन गरेको छ । विशेष गरी प्रदेश १, बागमती, गण्डकी र लुम्बिनी प्रदेशका केही स्थानमा भारी वर्षाको सम्भावना रहेकाले उक्त प्रदेशका पहाडी भूट्ठभागमा भू–क्षय, पहिरो तथा गेग्रान बहावको जोखिम रहेको साथै नदी नाला तथा खहरे खोलाहरूमा पानीको सतह बढ्न सक्ने महाशाखाले जारी गरेको सूचनामा उल्लेख छ ।
अहिले बिहान पनि प्रदेश १, बागमती र गण्डकी प्रदेशका थोरै स्थानहरूमा र बाँकी प्रदेशका एक–दुई स्थानहरूमा वर्षा भइरहेको छ । आज दिउँसो प्रदेश १, मधेस, बागमती र गण्डकी प्रदेशमा सामान्यदेखि पूर्ण बदली रही बाँकी भू–भागहरूमा आंशिकदेखि सामान्य बदली रहनेछ ।महाशाखाका अनुसार प्रदेश १, मधेस, बागमती र गण्डकी प्रदेशका धेरै स्थानहरूमा र बाँकी प्रदेशका केही स्थानहरूमा मेघ गर्जन र चट्याङ्सहित हल्कादेखि मध्यम वर्षाको सम्भावना रहेको छ । प्रदेश १ र बागमती प्रदेशका एक–दुई स्थानमा भारी वर्षाको सम्भावना रहेको छ । आज राति पनि दिउँसोको जस्तै मौसमी प्रणाली रहने महाशाखाले जानएको छ ।हाल प्रदेश १, मधेस, बागमती र गण्डकी प्रदेशमा मनसुनी वायुको सामान्य प्रभाव रहेको छ भने पश्चिमी भू–भागमा स्थानीय वायु र पश्चिमी वायुको सामान्य प्रभाव रहेको छ । साथै भारतको उत्तर प्रदेश र आसपासमा रहेको न्यून चापीय प्रणालीको समेत नेपालमा प्रभाव रहेको छ ।
प्रतिक्रिया दिनुहोस्