काठमाडौं ३ माघ । नयां जनादेश अनुसार सत्ता हस्तान्तरणमा ढिलाई गरिरहेको सत्तारुढ दल नेपाली कांग्रेसभित्रै असन्तुष्टी बढेपछि सरकार प्रदेश प्रमुख र अस्थायी केन्द्र तोक्न तयार भएको छ । आज बस्ने मन्त्रिपरिषद बैठकले प्रदेश प्रमुख र प्रदेश अस्थायी केन्द्र तोक्ने भएको छ।

सरकारका रहेका दल र तिनैका मन्त्रीहरुबीच प्रदेश प्रमुख र अस्थायी केन्द्रबारे सहमति भएको सञ्चारमन्त्री मोहन बस्नेतले एबीसीलाई बताए ।

बस्नेताका अनुसार प्रदेश ३ को प्रमुखमा अनुराधा कोइरालालाई तोक्ने तयारी भएको छ । उनी माइती नेपालकी संस्थापक अध्यक्ष तथ कांग्रेस निकटद हुन् ।

प्रदेश १ मा प्राध्यापक गोविन्द सुब्बा र प्रदेश ४ मा बाबुराम कुँवर प्रमुख तोक्ने तयारी भएको छ । यी दुवै जना सार्वजनकि चर्चा बाहिरका मानिस हुन् ।

प्रदेश ६ मा कृष्णकेशरी खनाल र प्रदेश ७ मा मोहनराज मल्ल लाई प्रमुख तोक्ने तयारी भएको छ ।
प्रदेश २ र ५ मा राजपा र संघीय समाजवादी फोरमले सिफारिश गर्ने व्यक्तिलाई प्रमुख तोक्ने सरकार सम्बद्र स्रोतले जानकारी दियो ।

प्रदेशको अस्थायी केन्द्रबारेमा विभिन्न विवाद र दलहरुकै बीचमा सहमति नभएपनि आज बस्ने बैठकले तोक्ने बताइएको छ ।

सरकारी स्रोतका अनुसार प्रदेश १ को विराटनगर , २ को जनकपुर, ३ को भक्तपुर, ४ को पोखरा, ५ को बुटवल, ६ को सुर्खेत र ७ को धनगढीलाई अस्थायी केन्द्र तोकिने भएको छ ।
प्रदेशको केन्द्रका बारेमा १ नं. प्रदेश, ५ नं. र ७ नंंं. बढ्ता विवाद देखिंदै आएको छ ।