काठमाडौं । इन्टरनेशनल च्याम्पियन्स कपमा बार्सिलोनाबाट एमएसएन अर्थात मेस्सी, स्वारेज र नेइमार तीनै स्टार खेलाडीलाई देखिने भएका छन् ।
रियल मड्रिड स्टार क्रिष्टियानो रोनाल्डो भने नखेल्ने भएका छन् । रियल मड्रिडले इन्टरनेशनल च्याम्पियन्स कपका लागि मंगलबार खेलाडीहरुको नाम सार्वजनिक गरेको हो । जसमा चार पटक बलोन डिओर विजेता रोनाल्डोको नाम समावेश छैन । रसियामा हालै सम्पन्न कन्फेडेरेसन कप खेलेका रोनाल्डो इन्टरनेशनल च्याम्पियन्स कपमा भने परिवारका लागि समय दिएर आराम गर्ने भएका छन् । रोनाल्डो नखेले पनि मड्रिडका गारेथ बेल, करिम बेन्जेमा, टोनी क्रुस, लुका मोडरिक, इस्को, मार्सेलोसंगै भर्खरै अनुबन्धित थियो हर्नानडेजलाई भने देखिने छ । इन्टरनेशनल च्याम्पियन्स कपमा रियलले जुलाइ २३ तारिखमा म्यानचेस्टर युनाइटेडसंग खेल्नेछ । यस्तै बार्सिलोनाले जुलाइ २२ मा युभेन्टससंग खेल्नेछ । जुलाइ २९ मा भने बार्सिलोना र रियल मड्रिडबिच खेल हुनेछ ।