काठमाडौँ, २१ चैत । नेकपा एमालेका वरिष्ठ उपाध्यक्ष ईश्वर पोखरेलले व्यक्तिगत स्वार्थलाई केन्द्रित गर्नेहरू कम्युनिस्ट हुन नसक्ने बताउनुभएको छ । नेकपा एमाले चितवनले आयोजना गरेको जेपी भेटवालको चौथो स्मृति दिवसमा आयोजित श्रद्धाञ्जली सभा एवं स्मृतिग्रन्थ विमोचन समारोहमा बोल्दै उहाँले व्यक्ति भन्दा पार्टी सदैव माथि राखेर राजनीति गर्नुपर्नेमा जोड दिनुभयो ।

अहिले कम्युनिस्ट नेताहरूमा चुनावमा टिकट पाए राम्रो मान्ने अन्यथा दाम्लो चुडाएर अन्यत्र जान खोज्ने प्रवृत्ति विकसित हुँदै गएको भन्दै त्यो रोक्नुपर्ने उहाँले बताउनुभयो । जेपी भेटवालले मान्य अमान्य भएपनि पार्टीको निर्णय स्वीकार गर्ने नेता रहेको सम्झदै पोखरेलले स्थानीय चुनाव आउँदै गरेको र मेयर उपमेयर, प्रमुख उपप्रमुखको टिकट नपाए पार्टीकै विरोध गर्नेहरू रहेको भन्दै यो सच्चिनुपर्ने बताउनुभयो । साथै उहाँले अबको चुनावमा एमाले एक्लै गठवन्धनसँग भिड्ने र माओवादी केन्द्र तथा नेकपा समाजवादीसँग कुनै हालतमा तालमेल नहुने प्रष्ट पार्नुभयो । भइरहेको बहुमतको कम्युनिष्ट सरकार भत्काएर कांग्रेससँग गठबन्धन गर्नेहरू कुनै हालतमा सहकर्मी हुन नसक्ने उहाँको प्रष्टोक्ति थियो ।

कार्यक्रममा जागृतप्रसाद भेटवाल स्मृतिग्रन्थ विमोचन गरिएको थियो भने अन्य पार्टी परित्याग गरेर नेकपा एमालेमा प्रवेश गर्नेहरुलाई पोखरेलले खादा र अविर लगाएर स्वागत गर्नुभएको थियो ।