काठमाडौँ, १९ चैत । नेपाली काँग्रेसका नेता रामचन्द्र पौडेलले आगामी स्थानीय निर्वाचनका लागि गठबन्धन जरुरी भएको बताउनुभएको छ । आज भरतपुर विमानस्थलमा पत्रकारहरुसँग कुराकानी गर्दै उहाँले यस्तो बताउनुभएको हो । गठबन्धनविना निर्वाचनमा जान नहुने भन्दै नेता पौडेलले ७० वर्षसम्म लडेर ल्याएको उपलब्धि रक्षाका लागि पनि अहिले गठवन्धन आवश्यक भएको बताउनुभएको हो ।

अहिले गठबन्धनबीच छलफल जारी रहेको र कुन स्थानीय तहमा कसलाई उम्मेदवार गराउने भन्ने निर्णय आउन बाँकी भएको समेत उहाँले बताउनुभयो । स्थानीय स्तरबाट छलफल भएपछि क्षेत्र, प्रदेश र बल्ल केन्द्रले निर्णय गर्ने बताउनुभएको छ । उहाँले गठबन्धन भएर जाने प्रष्ट पार्नुभएको हो । नेता पौडेलले केपी ओलीले विगतमा गरेका गतिविधिलाई इंकित गर्दै प्रतिगमनबाट देशलाई बचाउनका लागि गठबन्धन आवश्यक भएको बताउनुभयो । परिवर्तन जोगाउनका लागि यो गठबन्धन भएको समेत बताउनुभयो। स्थानीय तहमा पनि गठबन्धन हुने नेपाली काँग्रेसका नेता रामचन्द्र पौडेलको भनाइ छ ।