काठमाडौँ, ५ चैत । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आगामी निर्वाचनमा गठबन्धनको भर नपरेर आफ्नै बलमा चुनाव जित्न कार्यकर्ताहरुलाई निर्देशन दिनुभएको छ । सिन्धुलीमा पार्टी कार्यालयको उद्घाटन गर्दैै उहाँले पार्टी बलियो भए अरुले गठबन्धन गरौं भनेर आउने तर कमजोर भए कसैले नटेर्ने उल्लेख गर्नुभयो । गठबन्धन बचाउने तर त्यसकै भरमा निर्वाचनमा जान नहुने उहाँको तर्क थियो । अध्यक्ष दाहालले आफूले जित्ने तयारी नगरी गठबन्धनको भर गरे भोलि बिहान के हुन्छ भन्न नसकिने बताउनुभयो ।

स्थानीय तहको निर्वाचनलाई सामान्यरूपमा नलिन उहाँले कार्यकर्ताहरूलाई निर्देशन दिनुभयो । माओवादी हारे संविधान, जनयुद्ध, परिवर्तन, शान्ति प्रक्रिया हार्ने खतरा रहेको भन्दै अध्यक्ष दाहालले नेतृत्वलाई घेराबन्दी गर्ने, बद्नाम गर्ने काम भइरहेका जिकिर गर्नुभयो । एमाले अध्यक्ष केपी शर्मा ओली अहिले पनि गणतन्त्र र परिवर्तनको विरुद्धमा लागेको उहाँको आरोप थियो ।
गणतन्त्र र राजनीतिक परिवर्तनको विरुद्धमा भइरहेका गतिविधि रोक्न माओवादी, कांग्रेस र अन्य वामपन्थी दलहरू एकजुट हुनुपर्ने अध्यक्ष दाहालले बताउनुभयो । अर्को एक प्रसंगमा दाहालले आफूले धेरै सोचविचार गरेर अमेरिकी सहयोग परियोजना एमसीसी सम्झौता अनुमोदन गरेको स्पष्टीकरण दिनुभयो । अध्यक्ष दाहालले केन्द्र सरकार, प्रदेश सरकार, सभामुख र शान्ति सम्झौता धरापमा पर्ने देखेर एमसीसी पारित बताउनुभयो ।