काठमाडौं । नेकपा(माओवादी केन्द्र)को केन्द्रीय कमिटी बैठकले १५ जनाको पदाधिकारी संख्या बनाउने प्रस्ताव गरेको छ ।
आइतवार पार्टीको केन्द्रीय कार्यालय पेरिसडाँडाँमा बसेको माओवादी केन्द्रको केन्द्रीय कमिटी बैठकले आइतवारदेखि सुरु भएको आठौँ राष्ट्रिय सम्मेलनमा पार्टीको पदाधिकारी संख्या १५ जना बनाउने प्रस्ताव गरेको हो । जसमा १ जना अध्यक्ष, १ जना वरिष्ठ उपाध्यक्ष, ६ जना उपाध्यक्ष, १ जना महासचिव, २ जना उपमहासचिव, ३ जना सचिव र १ जना कोषाध्यक्ष रहने प्रवक्ता कृष्णबहादुर महराले जानकारी दिनुभयो । उहाँले केन्द्रीय कमिटीको फर्मेशन क्लष्टर अनुसार नै गर्ने निर्णय गरिएको पनि बताउनुभयो ।
केन्द्रीय कमिटी बैठकमा अध्यक्ष पुष्पकमल दाहाल प्रचण्डले एक्काइसौं शताब्दीको समाजवादको नेपाली बाटो शीर्षकको राजनीतिक प्रस्ताव पेश गर्नुभएको छ । प्रस्ताव पेश भएपनि सबै केन्द्रीय सदस्यलाई वितरण नगरिएका कारण त्यसउपर छलफल भने महाधिवेशनमै गरिने प्रवक्ता महराले बताउनुभयो । केन्द्रीय कमिटी संख्या २९९ जनाभन्दा बढी हुने उल्लेख गर्दै उहाँले केन्द्रीय कमिटीको तर्फबाट प्यानल प्रस्तुत हुने बताउनुभयो । सहमती हुन नसकेमा निर्वाचनमा जाने उहाँको भनाई छ । बैठकमा तीन सदस्यहरुले वैचारिक विषयमा आफ्नो फरक धारणा रहेको भन्दै त्यसलाई महाधिवेशनमा प्रस्तुत गर्न पाउनु पर्ने माग गरेका थिए । पेरिसडा“डामा भएको बैठकमा राम कार्की, परशुराम तामाङ, धर्मदत्त देवकोटासहितका नेताहरुले वैचारिक विषयमा आफूले अघि सारेको धारणामाथि महाधिवेशनमा छलफल हुनुपर्ने माग गरे । बैठकपछि एक केन्द्रीय सदस्यले तीनै जना नेताहरुले आफ्नो विचारमाथि दमन नगरियोस् भन्ने कुरा उठाउनु भएको जानकारी दिनुभयो । बैठकमा देवकोटाले साउनमा भएको केन्द्रीय समितिमा आफूले प्रस्तुत गरेको राजनीतिक प्रस्तावमाथि छलफल नै नभएको गुनासो गरेका थिए ।
अध्यक्षको प्रतिवेदनमा आफूले उठाएको विषय समावेश रहेनछ भने वैचारिक विषयमा फरकमत महाधिवेशनमा जाने देवकोटाको भनाइ रहेको ती केन्द्रीय सदस्यले जानकारी दिए । केन्द्रीय कमिटी बैठकमा अध्यक्ष प्रचण्डले भने कसैको विचारलाई पनि नदबाइने बताउनुभएको र फरक विचारहरुलाई बन्द सत्र हलमै धारणा राख्न दिने भन्नुभएको ती केन्द्रीय सदस्यले बताए ।
प्रतिक्रिया दिनुहोस्