काठमाडौं । प्रधानमन्त्री तथा कांग्रेस सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्ड बीच भेटवार्ता भएको छ ।

देउवालाई भेट्न शुक्रबार बिहान प्रधानमन्त्री निवास बालुवाटारमा पुग्नुभएका प्रचण्डले एमसीसीबारे सर्वदलीय छलफल गर्ने, सदन अवरोध खुलाउने लगायतका विषयमा कुरा गर्नुभएको उहा“को सचिवालयले जनाएको छ । एमसीसी र एमालेले लामो समयदेखि गरेको सदन अवरोध खुलाउने विषयमा दुई नेताबीच कुराकानी भएको प्रचण्डका स्वकीय सचिव रमेश मल्लले जानकारी दिनुभयो । त्यसक्रममा प्रधानमन्त्री देउवाले केही दिनमै सर्वदलीय बैठक बोलाउने बताउनुभएको थियो ।

अघिल्लो अधिवेशनदेखि नै प्रमुख प्रतिपक्ष नेकपा एमालेले निरन्तर धर्ना र नारावाजीसहित संसद् अवरुद्ध गरेको कारण एमसीसी अनुमोदनलगायतका संसदका विज्नेस प्रभावित भएका छन् । भेटको क्रममा अध्यक्ष प्रचण्डले देउवालाई कांग्रेसको सभापतिमा पुनःनिर्वाचित भएको बधाइ तथा शुभकामनासमेत दिनुभएको थियो । साथै राष्ट्रिय क्रिकेट टोलीका खेलाडीहरूमाथि क्यानले गरेको कारबाहीबारे पनि प्रचण्डले प्रधानमन्त्रीको ध्यानाकर्षण गराउनुभएको बताइएको छ ।