वाग्मती, २८ साउन :
सामाजिक विकासमन्त्री अध्यक्ष तथा एक जना कार्यकारी उपाध्यक्ष रहने वाग्मती प्रदेश युवा परिषद्ले पूर्णता पाएको छ ।यसअघि कार्यकारी उपाध्यक्षको मात्रै नियुक्ति भएको थियो । प्रदेशका सामाजिक विकासमन्त्री सरस्वती बस्नेतले परिषद्का नवनियुक्त सदस्यलाई आज शपथ ग्रहण गराउनुभयो । मन्त्रालयले परिषद् सदस्यमा इच्छा कुमारी राउत, केदार आचार्य, राधाकृष्ण गिरी, श्याम सुन्दर शिवाकोटी, नम्रता महर्जन, वसन्त न्यौपाने, छोटी लामा, सुदीप गौतम, प्रिती श्रेष्ठ र डालिया नेपालीलाई नियुक्त गरेको र आज नवनियुक्त सबै सदस्यले शपथ ग्रहण गरेको प्रदेश युवा परिषद्को कार्यालयले जनाएको छ ।
प्रदेश युवा परिषद् ऐन २०७६ अनुसार मन्त्रालयले उपाध्यक्षसहित युवाको हकहितको संरक्षणमा योगदान पु¥याएका महिला कम्तीमा तीन जनासहित छ जना र उद्योग, श्रम, कृषि, खेलकूद, विज्ञान प्रविधि, सूचना, सञ्चार, वातावरण, साहित्य तथा कलाक्षेत्रबाट प्रतिनिधित्व हुने गरी चार जना र लैङ्गीक तथा यौनिक अल्पसङ्ख्यकमध्येबाट एक जना गरी ११ जना सदस्य मनोनीत गर्ने व्यवस्था छ ।
मन्त्रालयले सोही ऐनअनुसार गत असार ४ गते परिषद्को कार्यकारी उपाध्यक्षमा सन्तोष चौलागाईंलाई नियुक्त गरेको थियो । शपथ ग्रहण कार्यक्रममा प्रदेशका सामाजिक विकासराज्यमन्त्री डा रामकुमार अधिकारीलगायत मन्त्रालयका कर्मचारीको उपस्थिति रहेको थियो । यसअघि आजै प्रदेशका मुख्यमन्त्री डोरमणि पौडेलले प्रदेश युवा परिषद्को कार्यालयको उद्घाटन गर्नुभएको थियो ।
सामाजिक विकासमन्त्री सरस्वती बस्नेतले नेपालमै युवा स्वरोजगारको उचित व्यवस्थापन गर्नुपर्ने रहेको बताउनुभएको छ । हेटौँडास्थित मन्त्रालयमा वाग्मती प्रदेश युवा परिषद्का नवनियुक्त मनोनीत सदस्य लागि आज आयोजित शपथ ग्रहण कार्यक्रममा मन्त्री बस्नेतले यस्तो बताउनुभयो ।
सो अवसरमा मन्त्री बस्नेतले नवनियुक्त मनोनीत सदस्यलाई स्वरोजगारमुखी चिन्तनका साथ अघि बढ्न र कार्यक्रमम गर्न सुझाव दिनुभयो । यस्तै मनोनीत सदस्यले प्रदेशका सबै जिल्लाका युवाको समस्यालाई समेट्ने गरी काम गर्न निर्देशन दिनुभएको छ ।
गत असार ४ गते परिषद्को उपाध्यक्षमा सन्तोष चौलागार्इं नियुक्त हुनुभएको भए पनि सदस्यको नियुक्ति नहुँदा परिषद्ले पूर्णता पाउन सकेको थिएन । यसअघि आजै नै वाग्मती प्रदेशका मुख्यमन्त्री डोरमणि पौडेलद्वारा परिषद्को कार्यालय उद्घाटन भइसकेको छ ।
–––
प्रतिक्रिया दिनुहोस्