काठमाडौं, ७ जेठ । देशमा विकसित पछिल्लो राजनीतिक घटनाक्रमबारे छलफल गर्न नेपाली कांग्रेसको पदाधिकारी बैठक बस्दैछ । राष्ट्रपतिको पछिल्लो आह्वानपछि पार्टीले चाल्ने कदमका विषयमा छलफल गर्न आज विहान बैठक बस्न लागेको कांग्रेस सहमहामन्त्री डा प्रकाशशरण महतले जानकारी दिनुभयो ।
पार्टीका पदाधिकारी तथा पूर्वपदाधिकारीको सहभागिता रहने बैठक सभापति शेरबहादुर देउवा निवास बुढानीलकण्ठमा बिहान ९ बजे बस्नेछ । कांग्रेसले राष्ट्रपति कार्यालयबाट नेपालको संविधानको धारा ७६ (५) बमोजिम सरकार गठन गर्न प्रकाशित विज्ञप्ति नेपालको संविधान विपरीत र अलोकतान्त्रिक भएको ठहर समेत गरेको छ ।
प्रधानमन्त्री केपी शर्मा ओलीको सिफारिस र ’इच्छा’ मुताविक हिजो साँझ राष्ट्रपति विद्यादेवी भण्डारीले संविधानको ७६ (५) अनुसार सरकार बनाउने समय आह्वान गरेको कांग्रेसको भनाइ छ । प्रधानमन्त्रीले विश्वासको मत नलिने हो भने त्यसअघि नै राजीनामा दिनुपर्ने तर्क कांग्रेसको छ ।
प्रतिक्रिया दिनुहोस्