चितवन, ९ पुस । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेकपा एमाले र माओवादी केन्द्रबीचको पार्टी एकता अन्तिम चरणमा पुगेको बताएका छन् ।

नेपाल बुद्धिजीवी परिषद् र नेपाल बुद्धिजीवी संगठन चितवनले आइतबार निर्वाचित सांसदका लागि आयोजना गरेको बधाई तथा शुभकामना कार्यक्रममा चितवन क्षेत्र नं. ३ बाट निर्वाचित सांसद प्रचण्डले दुई पार्टीबीचको एकता जनताको अभिमतले अनुमोदन गरिसकेको बताए ।

एकताबाट दुवै पार्टीपछि हट्ने कुरा नभएको बताउँदे उनले भने, “ मेरो ओलीको दिमागमा पार्टी एकता नहुने कल्पना समेत छैन । हामी पुल भत्काएर अगाडि बढेको हो, फेरि फर्किने ठाउँ राखेर अगाडि बढेको होइन ।” संगठन मिलाउँदा कठिन हुने जटिलताको विकल्प आफूहरुले सोचिसकेको बताउँदै प्रचण्डले भने, “पछि हट्ने विकल्प छैन ।”
उनले शनिबार र आइतबार बिहान पनि आफूले एमालेका अध्यक्ष केपी शर्मा ओलीसँग टेलिफोनमा कसरी छिटो पार्टी एकता गर्ने भन्ने विषयमा छलफल गरेको जानकारी दिए ।

उनले राष्ट्रियसभा निर्वाचनमा एकल संक्रमणीय प्रणाली सम्भव छैन भन्दै विपक्षमा रहने काँग्रेसको प्रतिनिधित्व गराउँदा भने राम्रो हुने बताए । उनले भने, “काँग्रेसको प्रतिनिधित्व नहुँदा वामपन्थीका लागि पनि खुशीको कुरा होइन, प्रतिपक्ष सहभागी हुँदा बहस र छलफलले जीवन्तता लिन्छ ।”
प्रचण्डले भने तर संविधानको मूल सिद्धान्त बहुमतीयबाट अहिले पछि फर्कन मिल्दैन । पुरानो एकल संक्रमणीय सिद्धान्त हटाउनु भनेको नै बहुमती मान्नु रहेको स्पष्ट गरे।