काठमाडौं, १२ चैत्र । तपाईंले आफ्नो इन्टरनेट आधारित सामाजिक सञ्जालको पासवर्ड फेर्नुभयो ? पासवर्ड गोप्य राख्नुभएको छ ? पासवर्ड बलियो राख्नुभएको छ ?सामाजिक सञ्जालको दुरुपयोगका घटना बढेको भन्दै नेपाल प्रहरीको साइबर ब्युरोले सामाजिक सञ्जालको पासवर्डमा सावधान हुन सार्वजनिक अपिल गरेको छ । अरुले सजिलै ह्याक गर्न नसक्ने र बलियो खालको पासवर्ड सिर्जना गर्न व्युरोले अनुरोध गरेको हो । साथै, आफनो सामाजिक सञ्जालको पासवर्ड समयसमयमा बदल्न पनि ब्युरोले अनुरोध गरेको छ ।

व्युरोले सार्वजनिक अपिल गरेर भनेको छ– ‘तपाईंले प्रयोग गर्दै आइरहेको सामाजिक सञ्जालको पासवर्ड अन्य कसैले ह्याक गरी दुरुपयोग गर्नुका साथै सोही सामाजिक सञ्जाल दुरुपयोग गरी साथीभाई आफन्तसँग रकम माग गर्ने, ठगी गर्ने काम भइरहेको भन्ने सूचना एवं निवेदन यस व्युरोमा प्राप्त भइरहेको छ ।’

आफूले प्रयोग गर्ने सामाजिक सञ्जालको पासवर्ड अन्य व्यक्तिले परिवर्तन गर्न नसक्ने किसिमको राख्न, सुरक्षाका लागि समय समयमा पासवर्ड परिवर्तन गर्ने र मल्टि फ्याक्टर्स अथिन्टिकेसन् सेट गर्न व्युरोले अनुरोध गरेको छ । आफ्नो सामाजिक सञ्जालको दुरुपयोग भएमा सहयोगका लागि ब्युरोको फोन ०१–४२१९०४४, ४२१९०४८, मोबाइल नम्बर ९८५१२८६७७० मा उजुरी गर्न पनि भनिएको छ ।