काठमाडौं, ४ चैत्र ।  नेकपा एमालेका प्रभावशाली नेता माधवकुमार नेपालले सर्वोच्च अदालतले एमाले ब्युँताएपछि नयाँ शिराबाट जान ६ वटा प्रस्ताव गरिएको बताउनुभयो । आफूहरूले राखेका प्रस्ताव प्रधानमन्त्री एवं अध्यक्ष केपी शर्मा ओलीले नमानेपछि कार्यकर्ता भेला आयोजना गर्नुपरेको उहाँले बताउनुभयो । ललितपुरमा बुधवार आफूपक्षीय कार्यकर्ता भेलालाई सम्बोधन गर्दै नेता नेपालले ओलीले पार्टीमा एकलौटी ढंगले निर्णय गरेपछि कार्यकर्ता भेला गर्नुपरेको दावी गर्नुभयो । नेपालले अहिले पनि आफूहरू मिलेर अगाडि बढ्न चाहेको बताउनुभयो ।

अध्यक्ष ओलीसँग ६ वटा प्रस्ताव

१। एमालेको संगठनात्मक संरचना, राजनीतिक मान्यता, नेतृत्वहरू पूर्ववत् अवस्थामा यथावत रहनेछन् ।
२। पार्टीलाई विधि र पद्धतिको आधारमा सञ्चालन गर्नुपर्छ ।
३। पार्टीका बैठक कसैको निवास या सरकारी निवासमा होइन पार्टी कार्यालयमा हुनुपर्छ ।
४। सिंगो कम्युनिस्ट आन्दोलनलाई एकजुट बनाउन पहल गर्ने ।
५। वामपन्थी नेतृत्वको सरकारलाई निरन्तरता दिनुपर्ने ।
६। पार्टीको मार्गदर्शनमा सरकार सञ्चालन गर्नुपर्ने ।

आफूहरूले राखेका विषय सम्बोधन गर्नुको सट्टा ओलीले फागुन २८ गते गुटको भेला गरेर आफूपक्षीय नेताहरूको जिम्मेवारी खोसेको आरोप नेपालले लगाउनुभयो ।
‘पार्टी एकता हुनुअघि नेकपा एमालेको नौ वटा केन्द्रीय समिति बैठक भएका थिए । ओलीले २८ गते गुटको भेला बोलाएर भेलालाई १० औं र ११औं बैठक भनेर दुईवटा कागजमा सही गराउनुभएको रहेछ,’ नेता नेपालले भने ।
त्यसपछि ओलीले आफूलाई वार्ताका लागि बोलाए पनि आफू बालुवाटार नगएको बताए ।

‘ओलीले बालुवाटार आउन भन्नुभयो, मैले आउँदिनँ भनें । उहाँले म बाहिर आउन मिल्दैन भन्नुभयो । म बालुवाटार नजाने, तपाईं बाहिर निस्कन नमिल्ने भएपछि नभेटौं भनें । होइन भेट्न त भेटौं भनेपछि पार्टी कार्यालयमा भेटेको हो । साथीहरूसँगै गएर भेटेको हो,’ नेपालले भन्नुभयो ।
कार्यकर्ता भेलाको बन्दसत्रमा नेता नेपालले राजनीतिक कार्यपत्र पेश गर्दैछन् ।