काठमाडौं, १ माघ । नेकपा ओली समूहका अध्यक्ष एवम् प्रधानमन्त्री केपी शर्मा ओलीले वैशाखमा घोषणा गरिएको निर्वाचनको माहौल तयार पार्न स्थायी कमिटीका नेताहरुलाई निर्देशन दिनुभएको छ । बुधबार बालुवाटारमा आफू निकट स्थायी कमिटी सदस्यहरुसँग ओलीले निर्वाचनको आधार तयार पार्ने गतिविधिमा केन्द्रित हुन निर्देशन दिनुभएको हो । माघे संक्रान्ति मनाउने गरी भनेर बोलाइएका स्थायी कमिटी सदस्यहरुसँग ओलीले अनौपचारिक छलफल गर्नुभएको थियो ।

भूगोलका इन्चार्जहरुसँग संगठन निर्माण, भेला, बैठक तथा आमसभाबारे जानकारी लिएका ओलीले सर्वोच्च अदालत र निर्वाचन आयोगमा चलिरहेको प्रक्रियाबारे पनि सोध्नु भएको थियो । प्रतिनिधिसभा विघटनविरुद्ध सर्वोच्च अदालतमा परेको रिटबारे ओलीले सुवास नेम्वाङसँग जानकारी दिनु भएको थियो । ‘सर्वोच्चमा परेको रिटको सुनुवाइ विषयमै प्रवेश गरेको छैन । अहिले संवैधानिक इजलास कि पूर्ण भन्ने नै टुंगिएको छैन । त्यसपछि मात्रै अरु भन्न सकिन्छ’, नेम्वाङको ब्रिफिङ थियो । निर्वाचन आयोगलाई दोस्रो पटक लेखिएको जवाफपत्रको अन्तर्वस्तुबारे नेम्वाङले ब्रिफिङ गर्नुभएको थियो । नेम्वाङले बुधबार मात्रै २१ पृष्ठ लामो पत्र बुझाएका थिए भने आयोगलाई निर्वाचनको तयारी नरोक्न आग्रह गर्नुभएको थियो । संक्रान्ति मनाउने र अनौपचारिक कुराकानी पनि गर्ने भनेर विहान एघार बजेदेखि शुरु भएको भेटवार्तामा बालुवाटार दिउँसो अबेरसम्मै चल्यो ।

प्रधानमन्त्री ओलीले मन्त्रीहरुलाई समेत बालुवाटार बोलाउनु भएको थियो । स्थायी कमिटीमा नरहेका मन्त्रीहरुलाई पनि ओलीले निर्वाचन केन्द्रित हुनेगरी गतिविधि गर्न सुझाव दिनुभएको छ । पुस ५ मा संसद् विघटनलगत्तै नेकपा विभाजित भएकाले मन्त्रीहरु पनि अहिले देश दौडाहामा छन् । बालुवाटार पुगेका मन्त्रीहरुले पनि पार्टी गतिविधिबारे ओलीलाई ब्रिफिङ गरेका थिए ।

स्थायी कमिटी सदस्यहरु र मन्त्रीहरुलाई ओलीले अब घोषणापत्र लेखनदेखि निर्वाचन परिचालनको योजना बनाउनेतिर सोच्न समेत निर्देशन दिनु भएको छ । ‘निर्वाचनको लागि अब अगाडि बढ्नुपर्छ । निर्वाचनको आशंका चिर्ने गरी वातावरण हामीले नै बनाउनुपर्छ । मेची(महाकाली आधार तयार गर्नुहोस्’, प्रधानमन्त्री ओलीले निर्देशन दिनु भएको थियो ।