भोलिदेखि लामो दूरीका गाडी चलाउने निर्णय, तयारी शून्य



काठमाडौं, ३१ भदौ । सरकारले भोलि अर्थात असोज १ गतेदेखि लामो दूरीका सार्वजनिक गाडी खोल्ने निणर्य गरेपनि यातायात व्यवसायीले आवश्यक तयारी अगाडि नबढेको बताएका छन् ।

यसअघि असोज ५ गतेदेखि भने पनि सरकारले एकाएक निर्णय फेरेकाले तयारी नभएको यातायात व्यवसायी राष्ट्रिय महासंघले जनाएको छ । ६ महिनासम्म थन्किएका गाडीलाई मर्मत नगरी गुडाउन नसकिने भएकाले तत्काल गाडी चलाउन सकिने अवस्था नरहेको नेपाल यातायात राष्ट्रिय व्यवसायी महासंघका महासचिव सरोज सिटौलाले जानकारी दिनुभयो । भोलिदेखि लामो दूरीको गन्तब्यमा जाने यात्रुका लागि आजैदेखि काउन्टर खोलेर टिकट खुलाउनुपर्ने भएकाले अहिलेसम्म तयारी नभएको उहाँले बताउनुभयो ।

सार्वजनिक यातायात सञ्चालन गर्दा अनिवार्य रुपमा स्वास्थ्य मापदण्ड र भौतिक दूरी कायम गर्नुपर्ने सरकारले मापदण्ड तोकेको छ । स्वास्थ्य मापदण्डमा गाडीमा सिट क्षमताको ५० प्रतिशत मात्रै यात्रु र ५० प्रतिशतसम्म बढी भाडा लिन पाइनेछ । तर लामो दूरीमा चल्ने गाडीमा सिटमा कति जनासम्म राख्ने, कहाँ र कसरी खाना नास्ता खुवाउने, सङ्क्रमणरहित बनाउन के के गर्ने लगायतका विषयमा यातायात व्यवसायी र मजदुर अन्योलमै रहेको व्यवसायिहरु बताउछन् ।

मापदण्डबारे सरकार र यातायात व्यवसायीबीच एकमत र स्पष्ट खाका नभएकाले अलमल परेको व्यवसायिको भनाई रहेको छ । यसअघि असोजको ५ गतेदेखि चल्ने भनेकाले आजैदेखि तयारी सुरु गरे असोज ५ गतेदेखि मात्रै लामो दूरीमा गाडी चलाउन सक्ने नेपाल यातायात राष्ट्रिय व्यवसायी महासंघका महासचिव सिटौला बताउनु हुन्छ ।

    Comment Here!


सम्बन्धित समाचार

View All