काठमाडौं, २८ भदौ ।  भारतले बाढीपहिरोका बेला आवश्यक पर्ने आपतकालीन राहत सामग्री प्रदान गरेको छ।

भारत सरकारको तर्फबाट भारतीय राजदूतावासका नियोग उप–प्रमुख नामग्य सी.खम्पाले सांसद चन्दा चौधरीलाई उक्त सामग्री हस्तान्तरण गरेकी हुन्।

नेपाल–भारत महिला मैत्री समाजका अध्यक्ष चौधरीलाई आइतवार उक्त सामग्री हस्तान्तरण गरिएको भारतीय दूतावासले जनाएको छ। टेन्ट तथा त्रिपाललगायतका उक्त राहत सामग्रीहरु नेपालका पाँच जिल्लाका बाढी तथा पहिरोबाट प्रभावित परिवारहरुलाई वितरण गरिने भारतीय दूतावासले जनाएको छ। बाढी र पहिरोका कारण हालसालै भएको विनाश र जनधनको क्षतिलाई ध्यानमा राख्दै यी राहत सामग्रीहरु नेपाल–भारत महिलामैत्री समाजले प्रदेश नम्बर २, ३, ५ र ७ का कैलाली, महोत्तरी, नवलपरासी, सर्लाही र सिन्धुपाल्चोक जिल्लाका स्थानीय सरकारसँग समन्वय गरी वितरण गर्नेछ, । भारतीय दूतावासले जारी गरेको विज्ञप्तिमा भनिएको छ। भारत सरकारको नियमित मानवीय सहयोग तथा आपतकालीन राहत सहायता अन्तर्गत उक्त राहत सामग्री नेपाललाई वितरण गरिएको दूतावासले जनाएको छ।