काठमाडौं, १५ भदौ । नेपालमा पछिल्लो २४ घण्टामा ७ जना कोरोना संक्रमितको निधन भएको छ । स्वास्थ्य तथा जनसंख्या मन्त्रालयका अनुसार ४ वर्षीया बालिकासहित तीन महिला र चार पुरुषको निधन भएको हो । योसँगै नेपालमा ज्यान गुमाउने कोरोना संक्रमितको संख्या २२८ पुगेको छ ।

नेपालमा पछिल्लो २४ घन्टाको अवधिमा ८९९ जना कोरोना संक्रमित थपिएका छन् । यस अवधिमा घना आवादी रहेको काठमाडौं उपत्यकामा २९८ संक्रमित थपिएको स्वास्थ्य तथा जनसंख्या मन्त्रालयले जनाएको छ ।

योसँगै नेपालमा कोराना संक्रमितको संख्या ३९ हजार ४६० पुगेको छ । पछिल्लो २४ घन्टामा ११ हजार १२९ जनाको नमुना पिसिआर विधिबाट परीक्षण गर्दा ८९९ जनाको नतिजा पोजेटिभ आएको हो । यो २४ घन्टामा ६९८ जनाले कोरोना जितेका छन् । यो सँगै कोरोना जित्नेको संख्या २१ हजार ४१० पुगेको छ । पछिल्लो २४ घण्टामा काठमाडौंमा १९०, ललितपुरमा ६७ र भक्तपुरमा ४१ संक्रमित थपिएका छन् ।