काठमाडौं, १३ साउन । सत्तारुढ दल नेपाल कम्युनिस्ट पार्टी (नेकपा) मा विवाद चर्किएको छ । अध्यक्ष एवं प्रधानमन्त्री केपी शर्मा ओलीले एकपक्षीय रुपमा स्थायी कमिटी बैठक स्थगित गरेपछि नेकपाका अर्का अध्यक्ष प्रचण्डसहितका नेताहरुले त्यसलाई अस्वीकार गर्दै कमिटी समितिको बैठक बसेका छन् ।

अध्यक्ष पुष्पकमल दाहाल प्रचण्डसहितका स्थायी कमिटीका नेताहरु प्रधानमन्त्री निवास बालुवाटार पुगेका छन् । उक्त छलफल हुनु अघि नै प्रचण्ड र वरिष्ठ नेता झलनाथ खनालले प्रधानमन्त्री ओलीलाई भेट्नु भएको थियो ।

स्रोतका अनुसार अहिले प्रचण्डले बैठकका लागि बालुवाटार पुगेका नेताहरुलाई ब्रिफिङ गर्नुभएको छ । पार्टी अध्यक्ष एवं प्रधानमन्त्री केपी शर्मा ओलीसँग अर्का अध्यक्ष पुष्पकमल दाहाल प्रचण्ड, वरिष्ठ नेता झलनाथ खनाल र महासचिव विष्णु पौडेलको छलफलपछि प्रचण्ड –नेपाल समूहले स्थायी समितिको बैठक सुरु गरेका हुन् । अध्यक्ष प्रचण्डकाका प्रेस संयोजक विष्णु सापकोटाले स्थायी समिति बैठक सुरु भएको जानकारी दिनुभयो । बैठकमा प्रधानमन्त्री ओली र उहाँ पक्षीय सदस्यहरु उपस्थित भएका छ्रैनन् । बैठकमा उपाध्यक्ष वामदेव गौतमले पार्टी विग्रह रोक्न भन्दै आजै ६ बुँदे प्रस्ताव सार्वजनिक गर्नुभएको छ । यसैबीच नेकपाका नेता एवं संस्कृति, पर्यटन तथा नागरिक उड्ययन मन्त्री योगेश भट्टराईले पार्टी दुर्घटना नजिक रहेको बताउनुभएको छ ।

अध्यक्ष पुष्पकमल दाहाल प्रचण्डको अध्यक्षतामा बालुवाटारमा स्थायी कमिटी बैठक सुरु भएको केही बेरमा नेता भट्टराईले ट्वीट गर्दै भन्नुभयो, ‘दुर्घटना नजिक देखिन्छ । सबै रोकिऔँ । सल्लाह गरौँ ।’