काठमाडौं, ३२ जेठ । चीनमा दुई महिना यताकै धेरै कोरोना भाइरसका संक्रमित फेला परेका छन् । गत अप्रिल १३ यताकै सबैभन्दा धेरै संक्रमित भेटिएका हुन् । चीनको नेशनल हेल्थ कमिसनका अनुसार भेटिएकामध्ये ३८ जना स्थानीय संक्रमित रहेका छन् ।

जसमध्ये ३६ संक्रमित बेइजिङका छन् । यो चीनको सरकारले राजधानी सहर बेइजिङको तथ्यांक शुरु गरेयताकै सबैभन्दा ठूलो संख्या कोरोना संक्रमित फेला पारेको हो । एकदिनअगाडि बेइजिङमा ६ जना संक्रमित फेला परेका थिए । तर, शनिबार सहरको दक्षिण पश्चिमी फेंगताई क्षेत्रको एक सहरमा ठूलो संख्यामा गरिएको परीक्षणपछि संक्रमितको संख्यामा वृद्धि भएको हो । संक्रमणको नयाँ लहरको डरले शनिबार चीनले खेल र पर्यटनसँग जोडिएका धेरै कार्यक्रमहरु रद्द गरेको थियो । चीनमा पछिल्लो २४ घण्टामा फेला परेका संक्रमितमध्ये १९ जना विदेशबाट आएका मानिसहरु थिए ।

अहिलेसम्म चीनमा कोरोना भाइरसको कारण ८३ हजार १३२ संक्रमित फेला परेका छन् भने ४ हजार ६३४ जनाको कोरोना भाइरसको कारण मृत्यु भइसकेको छ भने ७८ हजार ३६९ जना निको भएका छन् ।