काठमाडौं,२६ जेठ । भारतीय दुताबासले नेपालका विभिन्न स्थानमा ५६ वटा विद्यालय पुनर्निर्माण गरिदिने भएको छ ।

भारतीय दुताबासले सोमबार विज्ञप्ति जारी गरि भूकम्पबाट क्षेतिग्रस्त भएका गोरखा, नुवाकोट, धादिङ, दोलखा लगायतका जिल्लामा ५६ वटा विद्यालय पुनर्निर्माणका लागि २ अर्व ९५ करोड रुपैयाँसहयोग गर्ने जनाएको हो । उच्च माध्यमिक विद्यालयको पुनर्निर्माणका लागि सोमबार भारतीय दूतावास र नेपाल सरकार शिक्षा मन्त्रालय अन्तर्गतको केन्द्रीय आयोजना कार्यान्वयन इकाइ विच ७ वटा सम्झौतापत्रमा हस्ताक्षर भएको थियो ।

नेपालमा भूकम्प पश्चातको पुनर्निर्माण कार्यक्रमअन्तर्गत भारत सरकारको २.९५ अर्ब आर्थिक सहयोगमा यी विद्यालयहरुको पुनःनिर्माण गरिनेछ। भूकम्प प्रतिरोधी क्षमताको लागि यी विद्यालयहरु नेपाल सरकारले तोकेको मापदण्डअनुरुप पुनःनिर्माण हुनेछन्। विद्यालय पूर्वाधारमा शैक्षिक भवन, कक्षा कोठा, फर्निचर र छात्र तथा छात्राका लागि छुट्टै सरसफाइको सुविधा रहेको छ।

भूकम्प प्रतिरोधी संरचना पुनर्निर्माणको क्षेत्रमा भारतकै प्रमुख संस्थान केन्द्रीय भवन अनुसन्धान संस्थान, रुड्कीले यी विद्यालयहरुको पुनःनिर्माणको लागि प्राविधिक सहयोग प्रदान गर्नेछ। भूकम्प पश्चातको पुनर्निर्माण परियोजना लगायत नेपालको सामाजिक आर्थिक विकासका लागि नेपाल सरकार र यसका निकायहरुसँगको सहकार्यलाई निरन्तरता दिन भारत सरकार प्रतिबद्ध रहेको दूतावासले जनाएको छ।