काठमाडौं, १५ चैत । पूर्वप्रधानमन्त्री शेरबहादुर देउवा तथा उहाँको परिवारमाथि सम्पत्ति शुद्धीकरणसम्बन्धी अनुसन्धान अघि बढाइएको छ। सरकारी स्रोतका अनुसार देउवा परिवारको सम्पत्ति विवरण संकलन गर्दै अनुसन्धानलाई तीव्र बनाइएको हो।

सम्पत्ति शुद्धीकरण अनुसन्धान विभागमा परेको उजुरीका आधारमा देउवा परिवारले सत्ताको आडमा अस्वाभाविक तथा गैरकानुनी सम्पत्ति आर्जन गरेको आरोपमाथि छानबिन भइरहेको जनाइएको छ। सोही क्रममा देउवा परिवारका सदस्यहरूका नाममा रहेका सम्पत्ति तथा आर्थिक कारोबारको विवरण संकलन भइरहेको स्रोतले जनाएको छ।

प्रमाण नष्ट हुन सक्ने आशंकामा बूढानीलकण्ठस्थित देउवा निवास परिसरमा भइरहेको घर भत्काउने काममा प्रहरीले रोक लगाएको छ। अनुसन्धानमा असर पर्न सक्ने भन्दै उच्चस्तरीय निर्देशनपछि उक्त कार्य रोकिएको बताइएको छ।

स्रोतका अनुसार पछिल्लो समय देउवा परिवारसँग सम्बन्धित विभिन्न व्यक्तिहरूबीच भएका आर्थिक कारोबार तथा जग्गा खरिदबिक्रीका विवरणहरू पनि संकलन भइरहेका छन्। यस सम्बन्धमा केही नातेदार तथा निकट व्यक्तिहरूको कारोबारसमेत अनुसन्धानको दायरामा परेको जनाइएको छ।

यसअघि विभिन्न प्रकरणहरूमा देउवा परिवारको नाम जोडिएको भन्दै उजुरी परेपछि सम्बन्धित निकायले प्रमाण संकलन र विश्लेषणको काम अगाडि बढाएको हो। प्रहरीले यसबारे थप अनुसन्धान जारी रहेको जनाएको छ।