काठमाडौं, २२ चैत । कोरोना भाइरस ( कोभिड–१९) बाट विश्वभर संक्रमित हुनेको संख्या १० लाख ९७ हजार ८ सय १० पुगेको छ । शनिवार विहान ६ बजे सम्मको तथ्यांक अनुसार १० लाख ९७ हजार ८ सय १० व्यक्ति संक्रमित भएका हुन् । मृत्यु हुनेको संख्या पनि निरन्तर बढ्दो क्रममा छ । ५९ हजार १ सय ४० जना व्यक्तिको कोरोना संक्रमणबाट मृत्यु भएको छ । यस्तै, संक्रमणबाट निको भएर घर फर्किनेको संख्या भने २ लाख २८ हजार ४ सय ५ पुगेको छ । कोरोना संक्रमणको इपिसेन्टर यूरोपबाट अमेरिका सर्दै गएको विश्व स्वास्थ्य संगठनले चेतावनी दिएको छ । अमेरिकामा संक्रमण दर उच्च रहेको छ । अमेरिकामा ज्यान जानेको संख्या ७ हजार नाघेको छ । चीन, इटली, स्पेनपछिको कोरोनाको इपिसेन्टर बनेको अमेरिकामा पछिल्लो २४ घण्टामा थप १३ सय भन्दा बढी संक्रमितको ज्यान गएपछि कुल मृतकको संख्या सात हजारमाथि पुगेको हो ।

अमेरिकाका उच्च स्वास्थ्य अधिकारी डा. एन्थोनी फौसीले मृतकको संख्या छ हजार नाघेसँगै त्यहाँका सबै राज्यबाट घरभित्रै रहने आदेश जारी हुने विश्वास व्यक्त गरेका छन् ।

अमेरिकामा कोरोना संक्रमणदर उच्च बने पनि त्यहाँका राज्यहरूले अलग–अलग नियम बसालेका छन् । यसैबीच, अमेरिकी राष्ट्रपति कार्यालय ह्वाइट हाउसले आफ्नो नागरिकलाई मास्क र स्कार्फ लगाउन अपिल गरेको छ । संक्रमण दर उच्च बनेसँगै अमेरिकाले सतर्कता अपनाउन आफ्ना नागरिकहरूलाई अपिल गरेको हो ।
यद्यपि, यो नियम बाध्यकारी भने छैन । बीबीसीका अनुसार, राष्ट्रपति ट्रम्पले मास्क र स्कार्फ अनिवार्य नभएको बताएका छन् ।