काठमाडौं, २६ माघ ।  प्रधानमन्त्री केपी शर्मा ओलीले विकासको गति सुस्त भएको भन्दै मन्त्रीहरूसँग असन्तुष्टि व्यक्त गर्नुभएको छ ।

आइतबार राष्ट्रिय विकास समस्या समाधान समितिको ४७ औं बैठकमा प्रधानमन्त्री ओलीले सरकारको लक्ष्यअनुसार विकास निर्माण कार्यले तीव्रता पाउन नसकेको बताउनुभएको हो । केही प्रगति हुनुका साथै राम्रा काम पनि भएको बताउदै ओलीले सन्तोषजनक भने हुन नसकेको स्वीकार गर्नुभएको हो । ओलीले पुँजीगत खर्च अत्यन्त कम भएको र वैदेशिक लगानीका आयोजना पनि ढिला भएकोमा असन्तुष्टि जनाउनुभयो ।

उहांले मुलुकलाई अहिले तीव्र विकास आवश्यक रहेको उल्लेख गर्दै त्यसअनुसार काम गर्न मन्त्री, सचिव तथा आयोजना प्रमुखहरूलाई निर्देशन समेत दिनुभयो । देशलाई तीव्र विकास चाहिएकोले सबैले ध्यान त्यसैमा दिन प्रधानमन्त्रीले निर्देशन दिनुभयो । राष्ट्रिय योजना आयोगका उपाध्यक्ष पुष्पराज कँडेलले चालु आर्थिक वर्षको प्रथम चौमासिक सम्मको प्रगति, समितिको अघिल्लो बैठकका निर्णयहरूको कार्यान्वयन अवस्था तथा बैठकबाट समाधान गर्नुपर्ने समस्याहरू प्रस्तुत गर्नुभएको थियो । समितिको बैठकमा सङ्घीय सरकारका मन्त्री, सचिव, सातवटै प्रदेशका मुख्यमन्त्री तथा आयोजना प्रमुखहरू सहभागी हुने व्यवस्था रहेको छ ।