काठमाडौं, २३ माघ । नेपाली कांग्रेसका उपसभापति तथा संसदीय दलका उपनेता विजयकुमार गच्छदार सांसद पदबाट निलम्बित हुनुभएको छ । ललिता निवास जग्गा प्रकरणमा संलग्नता रहेको निश्कर्षसहित अख्तियार दुरुपयोग अनुसन्धान आयोगले बुधबार विशेष अदालतमा गच्छदारविरुद्ध भ्रष्टाचार मुद्दा दायर गरेपछि उहाँ स्वतः सांसदबाट निलम्बित हुनुभएको हो ।
भ्रष्टाचार मुद्दा लागेपछि प्रतिनिधिसभा नियमावली २०७५ अनुसार सांसद पदबाट स्वतः निलम्बित हुने व्यवस्था रहेको छ । गच्छद्धारले ललितानिवासको सरकारी जग्गा हडप्ने काममा सघाएको प्रमाणसहित अख्तियारले मुद्दा दायर गरेको हो । गच्छदार सुनसरीबाट प्रतिनिधिसभामा निर्वाचित हुनु भएको थियो ।
अख्तियारले भ्रष्टाचार मुद्दद्दा दायर गर्ने संकेत पाएपछि कांग्रेस उपसभापति विजय गच्छदार बुधबार दौडधुपमा थिए । बिहान बालुवाटार पुगेर प्रधानमन्त्री केपी ओलीलाई भेटेका गच्छदारले दिउँसो कांग्रेस सभापति शेरबहादुर देउवालाई उनकै निवास बूढानीलकण्ठमा पुगेर भेटेका थिए । गच्छदार अपराह्न ४ देखि ६ बजेसम्म पुनः देउवानिवास बूढानीलकण्ठमा रहेको एक स्रोतले बताएको छ ।
गच्छदारलाई मुद्दा लागेपछि कुनै समयको प्रभावशाली समूह ‘केजीबी’ अख्तियारको फन्दामा परेको छ । ०४८ पछि खुमबहादुर खड्का, गोविन्दराज जोशी र विजय गच्छदारलाई केजीबी समूहका रूपमा चिनिन्थ्यो र यो समूह कांग्रेसमा प्रभावशाली मानिन्थ्यो ।’ अख्तियारकै मुद्दामा खुमबहादुर जेल बसे, गोविन्दराज मुद्दा सर्वोच्चमा छ भने गच्छदारविरुद्ध पनि मुद्दा दायर भएको छ ।
गच्छदारमाथी अख्तियारले ९ करोड ६५ लाख ७६ हजार रुपैयाँ विगोसहित मुद्दा दायर गरेको प्रवक्ता प्रदिप कोइरालाले जानकारी दिनुभयो ।
प्रतिक्रिया दिनुहोस्