काठमाडौं, १७ माघ । प्रधानमन्त्री केपी शर्मा ओलीले सञ्चार माध्यम देश र जनताप्रति निष्ठावान हुनुपर्ने बताउनु भएको छ । उहाले शुक्रबार नेपाल टेलिभिजनको इटहरी च्यानलको औपचारिक सुभारम्भ गर्दै सञ्चार माध्यमले निराशा फैलाउने र अरुलाई हानी पुर्याउने काम गर्न नहुने बताउनुभएको हो ।
‘सञ्चार माध्यम देश र जनताप्रति प्रतिवद्ध र निष्ठावान पनि हुनुपर्छ’ ‘अरुलाई दुख दिएर, मानहानी गरेर, तेजोबध गरेर, अरुको वैयक्तिक, पारिवारिक, सामाजिक हैसियतमा क्षति पुर्याएर देश समृद्ध हुने होइन ।’ उहाले भन्नुभयो ।
प्रधानमन्त्रीले देश सुशासनको बाटोमा रहेका बेला जनतालाई निराश बनाउन नहुने धारणा राख्नुभयो । ‘यस्तो बेलामा हामीले जनतामा नराम्रो कुरा मात्र पस्किने, निराशातिर जनतालाई धकेल्ने होइन, आशावादिता जगाउने, आत्मविश्वास जगाउने काम गर्न जरुरी छ’ उहाले भन्नुभयो । सरकारले विगत दुई वर्षमा धेरै महत्वपूर्ण काम गरेको भन्दै प्रधानमन्त्री ओलीले यो कुरा जनतामा सुसूचित गर्ने जिम्मेवारी सञ्चार क्षेत्रकै समेत बताउनुभयो । सरकार पूर्ण प्रेस स्वतन्त्रताको पक्षमा रहेको भन्दै प्रधानमन्त्री ओलीले आशंका नगर्न अग्रहपनि गर्नुभयो ।
‘कतिले लोकतन्त्र संकुचित गर्न खोजेको, कतिले देशलाई तानाशाहीतर्फ लैजान खोजेको, कतिले प्रेसलाई अधिकारबाट सीमित गर्न खोजेको, वाक स्वतन्त्रता कुण्ठित गर्न खोजेको निरर्थक चर्चा परिचर्चा गरेका छन्’ ‘पूर्ण प्रेस स्वतन्त्रताका लागि सधैं चिन्तित छौं । सरकार त्यसप्रति प्रतिवद्ध छ ।’ उहाले भन्नुभयो ।
आफूहरु लोकतन्त्रका लागि लडेको भन्दै उहाले अनुशासित र अधिकार सम्पन्न व्यवस्था आफूहरुको चाहना भएको बताउनुभयो। सरकारले अधिकारमा कुनै बन्देज र सीमित नगर्ने भन्दै प्रधानमन्त्री ओलीले आफूहरुले संविधान र कानूनको बाटो हिँडाउन मात्र खोजेको जिकिर गर्नुभयो । संसदमा विचाराधीन सूचना प्रविधि विधेयक र मिडिया काउन्सिल विधेयक हिउँदे अधिवेशनबाट पारित गर्ने प्रधानमन्त्री ओलीले बताउनुभयो ।
प्रतिक्रिया दिनुहोस्