काठमाण्डौ ।
प्रतिनिधि तथा प्रदेशसभा निर्वाचनको मिति नजिकिंदै जांदा उम्मेदवारलाई लक्षित गरेर शृंखलाबद्ध बम आक्रमणको घटना बढेको छ । उम्मेदवालाई केन्द्रित गरेर आक्रमण बढेपछि निर्वाचन सुरक्षा व्यवस्थाप्रति प्रश्न चिन्ह खडा भएको छ ।
प्रदेश र प्रतिनिधिसभाको निर्वाचनको प्रचार प्रसारका लागि निर्वाचन अभियानमा हिंडेका उम्मेदवारहरुलाई लक्षित गरी पछिल्लो साता बम विस्फोट भइरहेका छन् । बम विष्फोटसंगै निर्वाचन प्रचार प्रसारमा लागेका उम्मेदवार, राजनीतिक दलका कार्यकर्ता र मतदाता समेत त्रसित भएका छन । शनिबार पनि विभिन्न स्थानमा बम विष्फोट भएको छ ।

नेपाली काग्रेसका वरिष्ठ नेता रामचन्द्र पौडेललाई लक्षित गरी तनहुंको नेपालडांडामा प्रेसर कुकुर बम प्रहार भएको छ । बम प्रहारबाट पौडेल सवार गाडीको सिसा फुटेको छ । पहाडसंगै तराईमा समेत बम आंतक सुरु भएको छ । रौतहटको चन्द्रानिगाहपुर नगरपालिका–५ राधाकृष्ण मन्दिर नजिकै बम विस्फोट भएको हो । विस्फोटमा ८ जना घाइते भएका छन् । पाथिभाराको सुनकोशीमा समेत बम विस्फोट भएको छ । शुक्रबार नुवाकोटबाट प्रतिनिसभाका उम्मेदवार रहेका नेपाली कांग्रेसका नेता डाक्टर रामशरण महतमाथि पनि युद्धकालकै घटनाजस्तै बम विस्फोट गराइको छ । घटनामा पांच जना घाइते भएका थिए । रोल्पामा वर्षमान पुनमाथि लक्षित गरेर ३ पटक बम विस्फोट गराइएको छ । माओवादी केन्द्रका नेता एवम् गोरखाका प्रतिनिधिसभा उम्मेदवार नारायणकाजी श्रेष्ठ, नेकपा माओवादी केन्द्र दाङबाट प्रतिनिधिसभा उम्मेवार कृष्णबहादुर महरा, रुकुमबाट प्रतिनिधिसभाका उम्मेदवार माओवादी केन्द्रका नेता जनार्दन शर्मा र पुर्व सभामुख ओनसरी घर्तिमाथि लक्षित गरेर आक्रमण भइसकेको छ ।

यस्तै भोजपुरबाट प्रदेशसभाका लागि उम्मेदवार बनेका एमाले नेता शेरधन राईलाई लक्षित गरेर बम प्रहार भएको थियो । यसरी उम्मेदवारको ज्यानै दिने उद्देश्यले शृंखलाबद्ध रूपमा बम विस्फोटको घटना भइरहंदा सरकार र सुरक्षा निकाय भने गम्भीर हुन सकेका छैनन् । यसरी निर्वाचनलाई असर गर्नेगरी शृङ्खलाबद्ध बम विष्फोट हुंदा आम मानिसमा समेत त्रास बढेको छ । बम विस्फोटका घटना बढ्दै गएपछि चुनावीसभामा जाने नेता तथा कार्यकर्ता पनि सशंकित भएका छन । सर्वसाधारण त्रसित बनाउने गरी विष्फोट गरिएको बम विप्लव नेतृत्वको नेपाल कम्युनिष्ट पार्टीका कार्यकर्ताहरुले राखेको अनुमान गरिएको छ । नेकपा एमालेका अध्यक्ष केपी शर्मा ओलीले आसन्न प्रदेश सभा र प्रतिनिधि सभा निर्वाचन विथोल्ने षडयन्त्र भइरहेको आरोपसमेत लगाएका छन् । अध्यक्ष ओलीले निर्वाचनविरोधी गतिविधिलाई तत्काल नियन्त्रण गरी शान्ति, सुरक्षाको व्यवस्था सुदृढ बनाउन सरकारसँग माग गरेका छन् । ओलीले निर्वाचन अभियानमा जुटिरहेका बेला उम्मेदवारहरुमाथि निरन्तर आक्रमण प्रयास भईरहँदा समेत सरकारले नियन्त्रणका लागि उचित कदम चाल्न नसकेको भन्दै आपत्ति जनाए ।
अध्यक्ष ओलीले सरकारसँग निर्वाचन विरोधी गतिविधिमा संलग्नहरुलाई तत्काल नियन्त्रणमा लिई कडा कार्वाही गर्न पनि माग गरेका छन् । निर्वाचन भयमुक्त वातावरणमा हुनुपर्दछ । उम्मेदवार र मतदाताले सुरक्षित महशुस गर्न सक्ने वातावरण बनाउने काम सरकारको हो । तर, अहिले त्यसो हुन सकेको छैन । त्यसैले सरकारले तत्काल सुरक्षा व्यवस्था मिलाउनु जरुरी देखिएको छ ।