जनकपुरधाम,३० मंसिर । यति बेला धनुषा जिल्ला बमको हल्लाले त्रसित भएको छ । पछिल्लो दुई दिन देखि यहाँ बम र शंकास्पद वस्तुको कारणले सर्वसाधारणमा डर उत्पन्न भएको छ । शुक्रवार राति भएको बम बिस्फोटमा तीन जनाको मृत्यु भएको घटना नसेलाउँदै आइतवार राती देखि तीन ठाउँमा भेटेको शंकास्पद वस्तुले सबैको ध्यानलाई केन्द्रित गरेको छ भने अहिले कुनै ठाउँमा शंकास्पद वस्तु हेर्दा त्यसलाई शंकाको रुपमा हेर्ने अवस्था भएको छ ।

आइतवार राति जनकपुरधाम उपमहानगरपालिका वडा नं। ९ मा रहेको संकटमोचन मन्दिरभन्दा केहि पर शंकास्पद वस्तु कुकर फेला परेको थियो । उक्त शंकास्पद वस्तु बम हुन सक्ने आशंकामा त्यस क्षेत्रमा प्रहरी परिचालन गरी उक्त ठाउँमा सर्वसाधारणको प्रवेशमा रोक लगाइएको थियो । आज विहान नेपाली सेनाको बम डिस्पोज गर्ने टोलीले उक्त शंकास्पद वस्तु बम नरहेको पाइएको छ ।

त्यस्तै आज विहान वडा नं। ९ मै सरस्वती मावि नजिक शंकास्पद वस्तु रहेको खबर आएपछि त्यहाँ घेरा दिई सर्वसाधारणलाई आवद जावतमा रोक लगाइएको थियो । नेपाली सेनाको बम डिस्पोजल टोली उक्त शंकास्पद वस्तुलाई जाँच गर्दा बम नभएको पुष्टी भएको धनुषाका प्रहरी प्रवक्ता प्रहरी नायव उपरीक्षक रामेश्वर कार्कीले बताउनुभयो । उहाँले सर्वसाधारणलाई नडराउन सर्वसाधारणसँग नडराउन आग्रह समेत गर्नुभयो । यसैगरी धनुषा जिल्लाको धनुषाधाम नगरपालिका वडा नं। ५ मा रहेको श्री माध्यमिक विद्यालयको लेखा शाखाको झ्यालमा शंकास्पद वस्तु रहेको खबर आएको थियो । शंकास्पद वस्तु रहेको खबर आएपछि स्कुललाई खालि गराएर त्यहाँ पनि बम डिस्पोज टोली पुगेका थिए तर त्यहाँपनि उक्त शंकास्पद वस्तु फोहरको थैला रहेको पाइएको धनुषा प्रहरीले जानकारी दिए।

एनसेलको आयोजनामा जनकपुरधाममा पुस ३ गते आयोजना हुन लागेको एनसेल मेलालाई लक्षित गरेर नेकपा विप्लवको त्रास फैलाउने काम हुन सक्ने सुरक्षा निकायको अनुमान छ । धनुषाका प्रमुख जिल्ला अधिकारी प्रदिपराज कणेलका अनुसार यो घटनामा विप्लवको कार्यकर्ताले हात हुन सक्छ । धनुषा जिल्लाको क्षिरेश्वरनाथ नगरपालिका वडा नं। ५ मा शुक्रवार राती भएको बम बिस्फोटमा ईलाका प्रहरी कार्यालय महेन्द्रनगरका प्रहरी निरीक्षक सहित तीन जनाको मृत्यु भएको थियो भने अहिले पनि तीनजनाको उपचार धरानमा भईरहेको छ ।