धरान, १६ मंसिर । चुनाव जितेर अबिर माला समेत लगाइसकेका उम्मेदवारले माला फुकालेर अर्कोलाई बधाई दिनुपर्‍यो भने कस्तो होला ? धरान उपहानगरपालिका वडा नम्बर ७ को उपचुनावमा मेयर र वडाध्यक्ष दुवैमा नेपाली कांग्रेसले जितेको भनेर बिजय जुलुस पनि हुँदै थियो । तर एकाएक वडा नम्बर ७ को वडाध्यक्षमा नेकपाका जीवन सुवेदीले १ मतले जितेको आधिकारिक घोषणापछि अबिर माला लगाएर विजयोत्सवमा रहेका कांग्रेसका सुवर्ण पालिखेले माला फुकाल्नुपर्‍यो । विजय उत्सव मनाइसकेपछि एक मतले हारेको जानकारी निर्वाचन आयोगले गराएपछि उहाँले अबिर पुछेर माला फुकाले घर तर्फ लाग्नु भएको थियो । नेकपाका जीवन सुवेदी ६२२ मतले बिजयी हुनुभएको छ भने पालिखे ६२१ मतमा पाउनु भएको छ ।
पुनः मतगणना गर्दा पनि नेकपाका जीवन सुवेदीको ६२२ मत भएकोले निर्वाचन अधिकृतले सुवेदीलाई नै विजयीको प्रमाणपत्र दिनु भएको थियो । ।