काठमाण्डौं, २२ कार्तिक । सिरिया जलवायु परिवर्तन सम्बन्धी पेरिस सम्झौतामा सहभागी हुने भएको छ ।यसअघि जलवायु परिवर्तन सम्बन्धी पेरिस सम्झौताबाट बाहिर रहँदै आएको सिरियाले सामेल हुने निर्णय गरेसँगै अब यो सम्झौताबाट बाहिर अमेरिकामा मात्रै रहेको छ ।

अमेरिकी राष्ट्रपति डोनाल्ड ट्रम्पले गएको जुनमा जलवायु परिवर्तन हावादारी कुरा रहेको भन्दै आफ्नो देश यो सम्झौताबाट बाहिने घोषणा गर्नुभएको थियो । सिरिया सम्झौतामा सामेल भएपछि अमेरिका मात्रै एउटा त्यस्तो देश हो जसले पेरिस जलवायु सम्झौताको विरोध गरेको छ । पेरिस सम्झौता जलवायु परिवर्तन नियन्त्रणका लागि अहिलेसम्मकै सबैभन्दा महत्वपूर्ण विश्वव्यापी सम्झौता हो । यो सम्झौता अनुसार विश्वभरका देश जलवायु परिवर्तन कम गर्नका लागि एकताबद्ध भएका छन् । सन् २०१५ मा पेरिसमा यो सम्झौता हुँदा सिरिया र निकारा गुआ मात्रै यसबाट बाहिर थिए । त्यसबेला अमेरिका बाराक ओबामाको प्रशासनमा थियो र सम्झौतामा राजी भएको थियो । गएको अक्टोबरमा निकारागुआ पनि सम्झौतामा सामेल भएपछि अमेरिका र सिरिया यसबाट बाहिर थिए ।

अमेरिकाले गएको जुनमा सम्झौतबाट बाहिर निस्कने घोषणा गरेको भएपनि सम्झौताको नियम अनुसार अमेरिका सन् २०२० मा मात्रै यो सम्झौताबाट बाहिरिन पाउँछ । यो सम्झौताले अमेरिकालाई दण्डित गर्ने भन्दै राष्ट्रपति ट्रम्पले बाहिरिने घोषणा गर्नुभएको थियो । यो सम्झौता अनुसार विश्वको तापक्रम वृद्धी दुई डिग्री सेल्सियस भन्दा कम र सकेसम्म १.५ डिग्री भन्दा माथि जान नदिन प्रयास गरिने छ । यस्तै कार्बन उत्सर्जन बढी गर्ने देशले विकासशील तथा कार्बन उत्सर्जन कम गर्ने देशलाई आर्थिक सहयोग गर्नु पर्ने पनि सम्झौतामा उल्लेख गरिएको छ ।