काठमाडौं, १२ असोज । दशैं, तिहार जस्ता चाडपर्वहरु नजिकिदै गर्दा राजधानी बजारमा तरकारीको भाउ पनि बढेको छ । निरन्तर वर्षाका कारण उत्पादन कम हुने, ढुवानीमा समस्या र उपलब्ध उत्पादित सामाग्री पनि छोटो समयमा नै नाश हुने कारण बजारमा तरकारीको भाउ बढेको कालीमाटी फलफूल तथा तरकारी बजार विकास समितिले जनाएको छ ।
आजभोली खुद्रा बजारमा प्याजको मूल्य प्रतिकेजी १ सय ३० रुपैंया भन्दा बढी छ । दशैं, तिहार जस्ता चाडवाडहरु नजिकिदै गर्दा आलु, प्याज, सिमी, बोडी तथा सागसब्जीको भाउ पनि बढेको छ । चाडवाड नजिकिदै गर्दा तरकारीको भाउ बढेपछि आम उपभोक्ता चिन्तित बनेका छन् । प्याज उत्पादनमा आत्मनिर्भर हुन नसक्दा प्याजका लागि नेपाल सधैं भारतमा निर्भर हुनुपर्ने अवस्था छ । आजभोलि भारतमा पनि प्याजको मूल्य बढेको छ । भारतीय महंगीको प्रभाव नेपालमा पनि नपर्ने कुरै भएन । छिटै नाशवान उत्पादन एवं मौसमी प्रभावका कारण प्याज लगायतका तरकारीको भाउ बढेको समितीका उपनिर्देशक विनय श्रेष्ठले बताउंछन् ।
सागसब्जी तथा तरकारीको भाउ महंगो हुँदा सबैभन्दा मर्कामा पर्ने भनेको आम सर्वसाधारण नै हुन् । विगतका वर्षमा यति धेरै महंगी बढ्दैनथ्यो । तर, दशै जस्तो चाडवाड नजिकिदै गर्दा भनेको जस्तो सामान त पाइएको छैन नै, पाउने सामान पन िअत्यायिक महंगो भएको छ । सरकारले नियमित अनुगमन नगर्ने, चाडवाड आउंदा मात्र अनुगमनको नाटक गर्ने, त्यहि अनुगमन पनि व्यापारी अनुकुल हुने गरेको उपभोक्ता आरोप लगाउंछन् । सरकारले निरन्तर अनुगमन गरेर सुलभ र सहज रुपमा उपलब्ध हुने गरी बजार व्यवस्थापन गर्नुपर्ने उपभोक्ताको माग छ ।
निरन्तर वर्षका कारण आवश्यक तरकारी उपलब्ध नभएको व्यापारीहरु बताउँछन् । वर्षाका कारण किसानको गाउँ–ठाउँमा गाडी जानसक्ने अवस्था छैन । ढुवानी भएका सामाग्रीहरु पनि वर्षाका कारण छोटो समयमा नै कुहिने र गल्ने गरेको व्यापारीहरुको गुनासो छ । यसले गर्दा पनि बजारमा तरकारीको भाउ बढ्न गएको व्यापारीहरु दाबी गर्छन् ।
प्रतिक्रिया दिनुहोस्