दशै आउन अब १ महिना पनि बाँकी नुहँदा पनि अग्रिम टिकट बुकिङ खुल्ला गरिएको छैन । अग्रिम बुकीङ खुल्ला नगरिदा दशै मान्न, जान आउन सर्वसाधारणलाई समस्या हुने देखिएको छ । यातायात व्यवसायीले भाडा वृद्धिको माग राखि बुकिङ खुल्ला नगर्दा सर्वसाधारण अन्यौलमा परेका हुन् ।
यस वर्षको वडा दशैँ आउन अब केवल महिना दिन मात्र बाँकी छ । असोज १२ बाट यस वर्षको दशै शुरु हुन्छ । दशैँमा काठमाडौ उपत्यकाबाट लाखौ मानिस बाहिरिन्छन् । अन्य चाडपर्व भन्दा दशै बढी महत्व हुने भएकोले दशैँ मान्न जाने चाप बढी हुन्छ । गत वर्षको तथ्यांक अनुसार काठमाडौँ उपत्यकाबाट करिब २० लाख मानिस दशैँको बेला बाहिरिने गर्छन । यस्तो अवस्थामा काठमाडौँबाट बाहिरिन सर्वसावधारणलाई निकै सास्ती हुने गरेको छ । यातायातको साधनको अभाव, मनलाग्दी भाडा असुली लगायतले यात्रु वर्षेनी मारमा पर्दै आएका छन् । अघिल्ला वर्षहरुमा यतिखेर अग्रिम टिकट बुकिङ भइरहेको हुन्थे । तर यस वर्ष यातायात व्यवसायीले भाडा दर लगायतका कारण देखाउदै अग्रिम बुकिङ खुल्ला गरेका छैनन् । तर सरकारले यातायात व्यवसायीलाई अग्रिम बुकिङ खुल्ला गर्न निर्देशन गरिसकेको छ । व्यवसायीले भने विभिन्न कारणहरु देखाउँदै अग्रिम बुकिङ खुलाएका छैनन् ।सर्वसाधारणले अग्रिम बुकिङ छिटोभन्दा छिटो खुलाउन माग गरेका छन् ।
यसपल्ट यतिखेरसम्म अग्रिम बुकिङ खुल्ला हुन नसक्नुको कारण हो, यातायात व्यवसायीले भाडा वृद्धिको माग गरिरहेका छन् । वैकिङ क्षेत्रमा आएको तरलताको कारण अघिल्लो वर्षमा जस्तो बस सञ्चालन गर्न नसकेको उनीहरुको तर्क छ । सिमित सवारी साधनले एकतर्फी रुपमा यात्रु ओसार्नुपर्ने भएकोले भाडामा समायोजन हुनुपर्ने उनीहरुको शर्त हो । भाडा वृद्धि गर्न लागेको कुरा उनीहरु स्वीकार गर्न तयार छैनन् । यद्यपी मुल कुरा व्यवसायीले भाडा वृद्धि गर्न नपाएर सरकारलाई अप्ठ्यारो पारि घुडा टेकाउने नीति प्रष्ट भएको सहजै बुझ्न सकिन्छ ।
त्यसो त यातायात व्यवसायीले दशैँ तिहारजस्तो मुख्य चाडमा मात्रै भाडाको बखेडा झिक्ने गरेका छन् । यातायातको साधनको कृतिम अभाव खडा गरि यातायातक्षेत्रमा सिन्डिकेट र दादागिरी देखाउने गरेका छन् । यसमा सरकार आफैँ निरिह बनेको छ । सर्वसाधारणले जति भन्यो उति भाडा तिरेर यात्रा गर्नुपर्ने विवश छन् । हरेक वर्ष सरकारले अनुगमन गर्ने र दोषीलाई कारबाहि गर्ने भनिएपनि सरकारी आश्वासन आश्वासनमै सिमित छ । तर भाडा वृद्धि गर्ने विषय विभागको मात्रै अधिकार क्षेत्र नभएकोले यस वर्ष भाडा बढ्ने अथवा नबढ्ने भन्न नसकिने यातायात व्यवस्था विभागका प्रवक्ता तीर्थराज खनालको भनाइ छ ।
सर्वसाधारणले भने सरकार हरेक वर्ष भाडा निर्धारण र अनुगनमा चुक्ने गरेको भन्दै यसको प्रभावकारीतामा बेलैदेखि ध्यान दिन सरकारलाई आग्रह गरेका छन् । अग्रिम बुकिङ कहिले खुलाउने भन्नेमै अन्योलमा रहेको विभाग दशैतिहारमा यातायातका साधनले गर्ने ठगिलाई भने अनुगमन गर्ने विभागको आश्वासन छ । सारमा सरकारी कर्मचारी र यातायात व्यवासायीको मिलेमतोमा सर्वसाधारणलाई ढाड सेक्ने काम भएको छ । चाडबाड मुखैमा आएर यातायात व्यवसायीले अनेक बखेडा झिकेर सहज र सुलभ सेवा नदिनु भनेको राज्यलाई कमजोर देखाएर यातायातमा राज चलाउनु हो । सवल र स्थायी सरकारलाइ समेत अनेकन वाहानबाजीको बार्गेनिङ गरेर सडक कब्जा गर्नु कुनैपनि हालतमा स्विकार्य हुन सक्दैन । यसर्थ सरकारले वैज्ञानिक भाडादर निर्धारण गरि नियमित अनुगमन र कारबाही गर्दै सडकसेवालाई सहज सर्वसुलभ र व्यवस्थित बनाउन पहल गर्नैपर्छ ।
प्रतिक्रिया दिनुहोस्