काठमाडौं,२२ जेठ ।   पत्रकारको नाक भाच्ने अभिव्यक्ति दिएर  विवादमा तानिएका इटहरी उपमहानगर पालिकाका मेयर द्धारिकालाल चौधरीलाई क्षमायाचना गर्न नेकपा नेताहरुले सुझाव दिएका छन् ।

चौधरीको भ्रष्टाचार विरोधी मान्यतामा शंका गर्ने कुनै ठाउँ नभए पनि पदीय मर्यादाअनुकुल अभिव्यक्ति नभएको भन्दै नेकपाका स्थायी कमिटी सदस्यहरु शंखर पोखरेल र योगेश भट्टराई क्षमायाचना गर्न आग्रह गर्नुभएको छ ।

चौधरीले आफूविरुद्ध नियोजित रुपमा केही पत्रकार लागेको र उनीहरुको नाकको डाँडी भाच्न एक करोड रुपैयाँ र एउटा घडेरी छुट्याएको कुरा मंगलबार दिनभर सामाजिक संजाल मा चर्चाको विषय बन्यो ।

बुधबार बिहान सामाजिक सञ्जाल फेसबुुकमा स्ट्याटस लेख्दै पाँच नम्बर प्रदेशका मुख्यमन्त्रीसमेत रहेका पोखरेल र नेता भट्टराईले नेकपाले अलम्बन गरेको नीति सिद्धान्त र पदीय गरिमाविपरीत बोलेको भन्दै सच्याउन निर्देशन दिएका हुन् ।