काठमाडौं, ६ जेठ । पार्टी एकताको एकवर्ष पुगेसँगै नेपाल कम्युनिष्ट पार्टी(नेकपा) पोलिटब्युरो गठन र केन्द्रीय कमिटी सदस्यहरुलाई जिम्मेवारी बाँडफाँड गर्ने तयारीमा जुटेको छ । तर, पूर्व माओवादी केन्द्रका नेताबीच कुनै विधि, पद्धती र प्रणाली बिना नेताहरुलाई जिम्मेवारी दिइएको भन्दै असन्तुष्टि बढ्दै गइरहेको छ । पोलिटब्युरो गठनमा सबै विचार, समुहबाट एकिकरण गरी आएका नेताहरुको प्रतिनिधित्व हुनुपर्ने नेताहरुले माग गरेका छन् ।

तत्कालिन नेकपा (माओवादी केन्द्र) र नेकपा एमाले बीच एकिकरण भएर नेपाल कम्युनिस्ट पार्टी(नेकपा) बनेको जेठ ३ गते एक वर्ष पुग्यो । पार्टी एकिकरणको तीन महिनाभित्रै एकिकरणका सबै प्रक्रिया सक्काउने भनिएको थियो तर हालसम्म प्रक्रिया सकिएको छैन । जेठ ३ गते जनवर्गिय संगठनको संयोजक र सह–संयोजक तोकेर जनवर्गिय संगठनको एकिकरण प्रक्रिया पनि प्रारम्भ गरीएको छ । एकताप्रक्रिया सुस्त गतिमा अघि बढिरहेको छ । नेकपा यतिखेर पोलिटब्युरो गठन र केन्द्रीय समिति सदस्यहरुलाई जिम्मेवारी दिने विषयमा केन्द्रीत भएको छ । पोलिटब्युरो गठनको तयारीमा लागेपनि पूर्व माओवादी केन्द्रका नेताहरुबीच सहमती जुट्न नसक्दा नेकपाको पोलिटब्युरो गठन हुन सकेको छैन ।

पूर्व माओवादी केन्द्रमा जम्बो पोलिटब्युरो थियो । एमालेसँग एकता गर्नुअघि माओवादीले विभिन्न पार्टीसँग एकता गरेको थियो । फुटेर गएका आफ्नै पार्टीका पूर्व नेताहरुलाई पनि ठूलो पदको आश्वासनसहित फर्काएको थियो । माओवादी भित्रै जिम्मेवारी दिन नसकिरहेको अवस्थामा एमालेसँग एकिकरण भएपछि पूर्व माओवादीका नेताहरुलाई अहिले जिम्मेवारी बाँडफाँड गर्न निकै सकस परेको छ । पोलिटब्युरो गठनमा पूर्व माओवादीभित्र सबै समुहले सदस्य माग गरेपछि अध्यक्ष प्रचण्ड गृहकार्यमै रहेका छन् । पार्टीभित्र यसअघि निर्माण भएका कमिटी कुनै मापदण्ड, विधि, प्रणाली बिना बनाइएको भनेर आरोप आइरहेको बेला पोलिटब्युरो पनि बिना मापदण्ड बनाइने हो कि भन्ने चिन्तामा नेताहरु देखिएका छन् । यद्यपी पोलिटब्युरोको गठन गर्दा पूर्व माओवादी केन्द्रको तहगत संरचनालाई ध्यान दिएर विधि संगत नै छानिने नेकपा स्थायी कमिटी सदस्य अग्नी सापकोटा बताउँछन् ।
पूर्व माओवादी केन्द्रसँग एकतामा आएका कयौं समुह तथा नेताहरुले उचित जिम्मेवारी पाएका छैनन् । पोलिटब्युरो तथा पार्टीका अन्य कयौं कमिटी गठन गर्दा सबै खाले प्रवृति र दृष्टिकोणलाई समेट्दै छुटपुट भएका सबैलाई जिम्मेवारी दिनुपर्ने नेकपा स्थायी कमिटी सदस्य देवेन्द्र पौडेल बताउंछन ।

पूर्व माओवादी केन्द्रभित्र बरिष्ठ, कनिष्ठको आधारमा जिम्मेवारी नदिएर पहुँचको आधारमा जिम्मेवारी दिने गरिएकोमा नेताहरु असन्तुष्ट छन् । पार्टी एकदुई व्यक्तिले चलाउने कम्पनी जस्तो भएको भन्दै पार्टीलाई पार्टी जस्तो बनाउन उनीहरुले माग गरेका छन ।

तर, स्थायी कमिटी सदस्य अग्नि सापकोटा एकता प्रक्रियामा आउने र पार्टी भित्र भएका सबै नेताहरुको योगदानबारे पार्टी जानकार रहेकोले कसैप्रति अन्याय नहुने जिकीर गर्छन ।
पार्टीका एक अध्यक्ष प्रचण्डलाई आफ्नो पूर्व पार्टीभित्रको भागवण्डा मिलाउन हम्मेहम्मे परेको छ । तर, पूर्व माओवादी केन्द्रको जिम्मेवारी बाँडफाँड र भागबन्डामा अल्झिएर पार्टी एकतामा प्रक्रिया सम्पन्न गर्न ढिलाइ नहोस् भन्ने नेकपाका कार्यकर्ताहरुले चाहेका छन् ।