बर्दिया, १ जेठ । सामुदायिक विद्यालयको शौचालयको सरसफाईको अवस्था नाजुक रहेको भन्दै बर्दियामा नगरप्रमुख नै शौचालय सफाई अभियानमा जुटेका छन् । बर्दियाको बारबर्दिया नगरपालिकाका नगरप्रमुख दुर्गाबहादुर थारुले बारबर्दिया नगरपालिका १ मा रहेको सरस्वती माध्यमिक विद्यालयका शौचालय सफाई गरेका हुन् ।

नगरपालिकाले सुरुवात गरेको सामुदायिक बिद्यालयमा मेरो एक दिन कार्यक्रम अन्र्तरगत नगरप्रमुख थारुले बिद्यालयमा गएर शौचालय सरसफाई गरेका हुन् । जिल्लाका अधिकांश सामुदायिक विद्यालयकाको सरसफाईको अवस्था नाजुक रहेको छ । विद्यालयको शौचालय सफा र स्वच्छ हुनुपर्दछ भन्ने सन्देश दिनका लागि विद्यालयको शौचालय सफाई अभियान सुरु गरीएको हो ।

विद्यालयको शौचालय सरसफाई गरीसकेपछि विद्यालयका प्रधानाध्यापक ओमप्रकाश यादवलाई शिक्षकहरुको बिभागीय जिम्मेवारी दिएर काम गराउन बारबर्दिया नगरपालिकाका नगरप्रमुख दुर्गाबहादुर थारुले निर्देशन दिएका छन् ।

प्रत्येक शिक्षकलाई सरसफाई, अनुशासन, खेलकुद जस्ता जिम्मेवारी दिएर विद्यालयको सुधार गर्न तर्फ लाग्ने निर्देशन समेत दिनु भएको छ । विद्यालयको शौचालय देखि वातावरण एकदमै फोहर भएकोले सरसफाईमा ध्यान दिन आग्रह गरेका छन् । नगरप्रमुख थारुले बारबर्दिया नगरपालिकाका हरेक विद्यालयको अनुगमन गरी विद्यालय सरसफाइ अभियान सञ्चालन गर्ने बताएका छन् ।

नगरपालिकाले विद्यालय सुधारका लागि सामुदायिक बिद्यालयमा मेरो एक दिन भन्ने कार्यक्रम सञ्चालन गरीरहेको छ । जस्मा नगरका जनप्रतिनिधि तथा कर्मचारीहरु टोलीले सामुदायिक बिद्यालयमा गएर बिद्यालयको सरसफाई गर्ने, वृक्षारोपन गर्ने, विद्यार्थी शिक्षकहरुसँग छलफल गर्ने लगाएतका क्रियाकलापहरु गर्ने गरेको छ ।