धनकुटा,१ जेठ । नेपाली कांग्रेसका नेता एवम् पुर्व अर्थमन्त्री डा. रामशरण महतले सरकारको निती तथा कार्यक्रम निबन्ध जस्तो प्रस्तुत भएको बताउनु भएको छ ।

नेपाली कांग्रेसको जागरण अभियानको क्रममा धनकुटा आइपुग्नु भएको नेता महतले बुधबार बिहान प्रेस युनियन धनकुटाले आयोजना गरेको पत्रकार सम्मेलनमा बोल्दै निती तथा कार्यक्रममा हावादारी र प्रचारमुखी झुटका कुरा समावेश भएको आरोप लगाउनु भयो ।

उहाँले ठूला विकास निर्माणका कार्यक्रम व्यत्तिका नाममा घोषणा गरेर सरकारले गलत गरेको बताउँदै राजनितिक समझदारी विना व्यत्तिका नाममा सडक तथा विकासका काम गर्न नहुने बताउनु भयो ।

सडक यातायात विकासको पहिलो प्राथमिकतामा राखेर बाह्रै महिना चल्ने सडक निर्माण गर्न सरकारको पहिलो सोचाइ बन्नुपर्ने उहाँको भनाई थियो । सरकारले देशमा संक्रमणकाल सकिएको निती तथा कार्यक्रममा बताए पनि देशमा संविधान कार्यान्वयन र संघ, प्रदेश र स्थानीय तहको विवादले संक्रमणकाल थपिएको नेता महतको भनाइ थियो।

फरक प्रशंगमा महतले सरकार अधिनायकबाद बन्दै गएर प्रेस मात्रै होइन मानवअधिकार पनि उल्लंघन गर्न थालेको बताउनु भयो । द्धन्द्धको समयमा बेपत्ता बनेकाको छानबिन गर्न बनेको आयोगलाई सरकारले कुण्ठीत गरेको महतको भनाइ थियो।