नेपालगन्ज,२७ बैशाख । गर्मीका कारण बाँकेसहित पश्चिम तराईका विभिन्न स्थानको जनजिवन प्रभावित बन्दै जान थालेको छ । दिउँसोमा लाग्ने चर्को घाम र चल्ने तातो हावा ‘लु’ का कारण जनजिवन प्रभावित भएको हो ।

केहीदिनयता नेपालगन्ज लगायतका स्थानको तापक्रम बढिरहेको छ । नेपालगन्जको यसबर्षको अधिकतम तापक्रम ४२ डिग्री सेल्सियस पुगेको छ । पानी नपरेपछि अत्यन्त चर्को घाम र तातो हावा ‘लु’ चल्न थालेको हो ।

स्थानीय प्रभावले तातिरहेको जमिनमा फेरि तातो हावा थपिएपछि ‘लु’ चल्छ । जल तथा मौसम विज्ञान विभाग फिल्ड कार्यालय राँझाका अनुसार नेपालगन्जको न्यूनतम र अधिकतम दुवै तापक्रम ३७ देखि ४२ डिग्री सेल्सियस आसपास रहेको छ ।

नागरिकले चर्को घाम र तातो हावाको नियति भोग्नुपरेको छ । चर्को घाम र तातो हावासँगै गर्मी बढेपछि सरकारी तथा गैरसरकारी कार्यालयमा सेवाग्राहीको उपस्थिति पातलिएको छ भने बजारमा चिसो पेय तथा खाद्य पदार्थको बिक्री बढेको छ । तापक्रम बढ्नुको साथै चल्ने तातो हावा, हुरी, धुलो सँगैसँगै ग्रामीण बस्तीमा आगलागीको जोखिम बढेको छ ।

तातो हावाहुरीकै कारण आँप, हरियो तरकारी खेती प्रभावित भएको छ । कामदारको दैनिकी कष्टकर बन्न थालेको छ । तातो हावाकै कारण दिउँसो बाहिर हिँडडुल गर्न गाह्रो भएको छ । बजार समेत मानिसहरुको दिउँसो चहलपहल न्यून रहेको छ । गर्मीको मारमा सबैभन्दा बढी बालबालिका र बृद्वबृद्वा परेका छन् ।