अछाम,२० बैशाख । साँफेबगर नगरपालिका २ जाल्पादेवी श्रीकोट स्थित त्रिपुरा बहुमुखी क्याम्पसको भवन निमार्णका लागि जग खन्ने क्रममा सुन र चाँदी भेटिएको छ ।

चार कोठे भवनको पिल्लरका लागि जग खन्ने क्रममा मजदुरले १९ तोला ८९ लाल अर्थात् २ सय ३१ दशमलब ६७ ग्राम सुन र १ सय ३२ तोला ७३ लाल अर्थात् १५ सय ४८ ग्राम चाँदी फेला पारेको प्रहरीले जनाएको छ ।

फेला पारेको सुनचाँदी जिल्ला प्रहरी कार्यालय मंगलसेन अछाममा पठाईएको । सो स्थानमा मानिसको खुट्टा जस्तो देखिने पहेलो धातु पनि भेटिएको छ । मजदुरहरु बीच भागबण्डामा विवाद भएपछि कुरा बाहिर आएको वडा नम्बर २ का अध्यक्ष कालुसिंह कुँवरले बताउनु भयो ।

उहाँले भन्नु भयो ’करिब एक हप्ता अगाडी नै फेला परेको सुन चाँदी हो, तर मजदुर बीच कुरा नमिल्दा हिजो मात्र बाहिर आएपछि थाहा भयो । अहिले प्रहरीको निगरानीमा खन्ने काम भइरहेको छ । सो ठाउँबाट पुराना भगवानका मूर्ति समेत फेला परेका छन् ।’

’पहिले राजाको बसोबास रहेको ठाउँ भएकाले पुराना सुनचाँदीहरु भेटिएको हो,’ उहाँले भन्नुभयो फेला परेको सुन सुनचाँदी व्यवसायीसँग जाँच गरेपछि सरोकारवालाको रोहबरमा ईलाका प्रहरी कार्यालयमा राखिएको साँफेबगर नगरपालिका ४ मष्टामाण्डौँका वडा अध्यक्ष बालगिरी कुँवरले जानकारी दिनुभयो ।

प्रहरीका अनुसार मजदुरले फेला पारेको आशंकामा ६ जनालाई नियन्त्रणमा लिएर सोधपुछ भईरहेको प्रहरीले जनाएको छ । विस १४२४ मा श्रीकोटमा राजा सूर्य मल्लको दरबार रहेको इतिहास छ ।

बिस १४०९ मा डोटीलाई राजा निरय पालले स्वतन्त्र घोषणा गरेपछि उहाँको प्रभावलाई नष्ट पार्न र सिंजाको पकडमा डोटीलाई पार्न सूर्य मल्ल श्रीकोटमा दरबार बनाएर बस्न थाले पछि त्यस बेला सो ठाउँलाई सूर्यकोट दरबार भन्न थालिएको स्थानीयले बताएका छन् । पछि गएर स्थानीयले श्रीकोट भन्न थालेको जानकारहरु बताउँछन् ।