काठमाण्डौं, २७ असोज । अमेरिकाले राष्ट्रसंघीय निकाय युनेस्कोबाट अलग हुने घोषणा गरेको केही घण्टा नबित्दै इजरेलले पनि बाहिरिने बताएको छ ।

इजरेली प्रधानमन्त्री बेन्यामिन नेतन्याहुले अमेरिकी निर्णयको स्वागत गर्दै त्यसलाई ’बहादुरीपूर्ण’ र ’नैतिकताले भरिएको’ भनेका छन् । युनेस्कोकी प्रमुख इरिना बोकोभाले युनेस्कोबाट अमेरिका अलग हुनु ’अति दुःखको विषय’ भएको प्रतिक्रिया दिएकी छिन् । युनेस्कोबाट अलग हुने अमेरिकी निर्णय सन् २०१८ डिसेम्बर अन्त्यतिर कार्यान्वयनमा आउनेछ । त्यसअघिसम्म अमेरिका युनेस्कोको पूर्ण सदस्यकै रुपमा रहिरहनेछ ।

अमेरिकाले पेरिसस्थित मुख्यालय रहेको युनेस्कोबाट आफ्नो प्रतिनिधित्व विस्थापित गर्नका निम्ति एउटा पर्यवेक्षण मिसन खटाउने अमेरिकी विदेश मन्त्रालयले जनाएको छ । इजरेली प्रधानमन्त्री नेतन्याहुले ट्वीट गर्दै अमेरिकाले जस्तै युनेस्कोबाट अलग हुने प्रक्रिया समानान्तर रुपमा थाल्न अफ्नो विदेश मन्त्रालयलाई निर्देशन दिएको बताएका छन् । अमेरिका र इजरेलले युनेस्कोका केही निर्णयहरुलाई विरोध गर्दै आएको पृष्ठभूमिमा उनीहरुले पछिल्लो निर्णय गरेका हुन् ।

युनेस्कोले सन् २०११ मा प्यालेस्टाइनलाई पूर्ण सदस्यता दिने निर्णय गरेपछि त्यसको विरोधमा अमेरिकाले उक्त निकायलाई दिंदै आएको सहायतामा कटौती गरेको थियो । गत वर्ष युनेस्कोले जेरुसलेमस्थित महत्वपूर्ण पवित्रस्थलसंग यहुदीहरुको कुनै सन्दर्भ नजोडिएको एउटा विवादास्पद प्रस्ताव अंगीकार गरेपछि इजरेलले उससंगको सहकार्य तोडेको थियो । जेरुसलेमस्थित पवित्रस्थलहरुमा र वेस्ट ब्यांकमा इजरेलले गर्दै आएका गतिविधिहरुको समेत आलोचना गरेको थियो । यसै वर्षको शुरुतिर युनेस्कोले वेस्ट ब्यांकस्थित ’ओल्ड सिटी अफ हिब्रोन’लाई प्यालेस्टिनी विश्व सम्पदा सूचीमा राख्ने घोषणा गरेकोमा नेतन्याहुले निन्दा गरेका थिए ।