बुटवल,२ चैत । नेपाली कांग्रेसका केन्द्रीय सदस्य बालकृष्ण खांडले मुलुकको अखण्डता र सार्वभौमसत्ताका सम्बन्धमा जनमत संग्रह हुन नसक्ने बताउनुभएको छ ।

प्रेस युनियन रुपन्देहीले आज बुटवलमा गरेको पत्रकार सम्मेलनमा बोल्दै नेता खांडले राष्ट्रिय राजनितीको मुलधारमा नरहेका शक्तिलाई मुलधारमा ल्याउने सरकारको कदम सकारात्मक भएको बताउनु भयो ।

उहांले सहमती गर्ने सरकार र सहमतीमा आउने शक्तिको फरक फरक धारणा आउंदा आशंका उत्पन्न भएको स्पष्ट पार्नुभयो । सहमतीका बुंदाहरुका बिपरित सिके राउत समुहले देखाएको गतिबिधी आपत्तीजनक रहेको उहांको भनाई छ ।

कांग्रेस संसदिय दलका सचेतक समेत रहेका नेता खांडले हतियार र हिंसाको राजनिती नेपालीले खेप्न नसक्ने बताउंदै बिप्लप समुहलाई हिंसाको बाटो छाडेर जनताको मतबाट राजनिती गर्न आग्रह गर्नुभयो ।

उहांले मुलधारमा नआएका राजनितिक धारहरुका लागि सरकारले सधैं बार्ताको ढोका खोलि रहनु पर्ने भन्दै कुनैपनि शक्तिले हिंसात्मक राजनिती छाड्नै पर्ने बताउनु भयो । कांग्रेस संसदिय पद्धतीमा बिश्वास गर्ने पार्टी भएको भन्दै कांग्रेसको संसदिय भुमिका बलियो बनाउनेमा पार्टी केन्द्रित रहेको बताउनु भयो । सडक र अराजक खालको आन्दोलनमा कांग्रेसको बाटो नभएको उहांको धारणा छ ।