काठमाडौं, ७ कात्तिक । १३ वर्षिया बालिका निर्मला पन्तको बलात्कार तथा हत्या प्रकरणमा प्रमाण नस्ट गर्ने कार्यमा संलग्न रहेको आरोप लाग्दै आएका कञ्चनपुरका तत्कालीन प्रहरी निरीक्षक जगदीश भट्टले स्पष्टीकरण दिएका छन्।

कञ्चनपुरकै तत्कालीन प्रहरी प्रमुख प्रहरी उपरीक्षक (एसपी) डिल्लीराज विष्टले आज सम्म स्पष्टीकरण दिइसक्नुपर्ने भएको छ।

पन्तको हत्याको अनुसन्धानमा गम्भीर लापरबाही गरेको भन्दै बर्खास्त गर्नुअघि आफ्नो कुरा राख्न पाउने प्राकृतिक न्यायको सिद्धान्तअनुसार उनीहरु स्पष्टीकरण लिइएको हो।

बर्खास्त गर्नका लागि भन्दै प्रहरी प्रधान कार्यालयले गृहसचिवलाई पत्र पठाएको थियो। गृहले स्पष्टीकरण लिएर मन्त्रालयमा पेस गर्न प्रहरी प्रधान कार्यालयलाई आदेश दिएको थियो। प्रहरी प्रधान कार्यालयले प्रहरी निरीक्षक भट्टलाई सोमबार स्पष्टीकरणको पत्र थमाएको थियो। पत्र पाएको २४ घन्टाभित्र लिखित जवाफ पठाउनुपर्ने कानुनी प्रावधानअनुसार भट्टले स्पष्टीकरणको पठाई सकेका छन् भने प्रहरी प्रधान कार्यालयले एसपी विष्टलाई स्पष्टीकरणको पत्र बुझ्न सोमबार आग्रह गरेको थियो। एसपी विष्टले आफू अन्य काममा व्यस्त भएको बताउँदै हिजो मंगलबार पत्र बुझेको प्रहरी प्रधानकार्यालयले जनाएको छ। पत्र बुझेको २४ घन्टाभित्र लिखित जवाफ पठाउनुपर्ने भएकाले एसपी विष्टले आज सम्ममा जवाफ पठाउनु पर्नेछ।

एसपी विष्ट र प्रहरी निरीक्षक भट्टको जवाफ प्रहरी प्रधान कार्यालयले गृहसचिव प्रेमकुमार राईसमक्ष पेस गर्नुपर्ने हुन्छ। विष्टको जवाफ आएपछि भोलि नै गृहमा स्पष्टीकरणको लिखित जवाफ पेस गर्ने प्रहरी प्रधान कार्यालयले जनाएको छ। उनीहरुको जवाफ चित्तबुझ्दो नभए बर्खास्त हुनसक्ने गृह मन्त्रालयले जनाएको छ।

हत्याको अनुसन्धानमा लापरबाही गरेको भन्दै प्रहरी महानिरीक्षक सर्वेन्द्र खनालले गत असोज २९ गते प्रहरी उपरीक्षक विष्ट र प्रहरी निरीक्षक जगदीश भट्टराईलाई सेवाबाट निष्कासन गर्न गृह मन्त्रालयसमक्ष पत्राचार गरेका थिए।