पोखरा, ५ असोज । नेपाल सरकारका अर्थमन्त्री युवराज खतिवडाले सरकारले निजी क्षेत्रसँग प्रतिस्पर्धा गर्न आवश्यक नरहेको बताएका छन् । पोखरामा शुक्रबार उद्योग बाणिज्य संघको ३२ औं अधिवेशनको उद्घाटन समारोहलाई सम्बोधन गर्दै उनले यस्तो अभिब्यक्ति दिएका हुन ।

उनले लगानी गर्न निजी क्षेत्रलाई सरकारले प्रोत्साहन गर्ने तर प्रतिस्पर्धा गर्न आवश्यक नरहेको उल्लेख गरे ।

मन्त्री खतिवडाले चालू बर्षभित्रै ८ प्रतिशत आर्थिक बृद्धी हासिल गर्ने लक्ष्य रहेको भन्दै निजी क्षेत्रकै लगानी, उद्यमशिलता र उत्पादन गर्ने क्षमतालाई हेरेर नीति तथा कार्यक्रम तय गरेको बताए ।

उनले देशको समृद्धीका लागि कर अति आवश्यक भएपनि पछिल्लो समय करका बारेमा धेरै टिका टिप्पणी भैरहेको बताए । उनले सरकारले २५ बर्षमा खासै कर नीति परिवर्तन नगरेको उल्लेख गर्दै सुधारको नाममा बरु सजिलो बनाउँदै लगेको बताए ।

उनले प्रदेश र स्थानीय तहको लगानी बढाउन कर प्रणालीमा नयाँ काम गर्नुपर्ने भन्दै तल्ला तहमा प्रदत्त अधिकारको सीमाभित्र रहेर लगानी अनुकुल वातावरण बनाउन सरकार लागिरहेको जानकारी दिए ।

मन्त्री खतिवडाले ६ महिनाभित्रै लगानी सम्बन्धी सबै कानुन तयार गरेर लगानी सम्मेलन गर्ने तयारीमा सरकार लागि परेको बताए ।

उनले निष्कृय भैसकेका पूराना कानुनलाई खारेज गर्ने र केही संशोधनको लागी छलफल चलिरहेको समेत बताएका थिए ।