झापा,२ साउन । झापा जिल्लामा १०.३० प्रतिशत बजेट फ्रिज भएको कोष तथा लेखा नियन्त्रक कार्यालय झापाले जनाएको छ ।

झापाको स्थानीय तह र विषयगत कार्यालय गरी १४ अर्ब ६१ करोड ५० लाख ३८ हजार ७ सय ९९ रुपैया ३२ पैसा बराबरको कुल बजेट मध्ये आर्थिक बर्ष ०७४।७५ मा पूँजीगततर्फ ७९ प्रतिशत र चालुतर्फ ९३ प्रतिशत बजेट खर्च भएको छ ।

जसमध्ये चालुतर्फ ७८ करोड ७६ लाख ७२ हजार ९ सय ५६ रुपैया र पुँजीगततर्फ ७१ करोड ८३ लाख ५१ हजार ३ सय ३२ रुपैया गरी कुल १ अर्ब ५० करोड ६० लाख २४ हजार २ सय ८८ रुपैयाँ बराबरको बजेट फ्रिज भएको कोष तथा लेखा नियन्त्रक कार्यालय झापाका प्रमुख लावन्यराज दाहालले जानकारी दिनुभयो ।

अघिल्लो आर्थिक बर्ष ०७३।७४ मा झापाको ११ अर्व ४१ करोड ४८ लाख ४ हजार ८ सय ९४ रुपैया बराबरको कुल बजेटमध्ये ७६ करोड ३३ लाख २ हजार ६ सय १५ रुपैया बराबरको बजेट फ्रिज भएको थियो । अघिल्लो आर्थिक बर्षको तुलनामा गत आर्थिक बर्ष ०७४।७६मा बढी बजेट फ्रिज भएको देखिन्छ ।

गत आर्थिक बर्षको चालु खर्चतर्फ खुद बजेट ११ अर्ब १९ करोड ५३ लाख १० हजार २ सय ३४ रुपैयामा १० अर्ब ४० करोड ७६ लाख ३७ हजार २ सय ७८ रुपैया खर्च भएको थियो । असार मसान्तमा मात्र ८७ करोड ४९लाख १६ हजार ५३ रुपैया खर्च भएको देखिन्छ । त्यस्तै पँुजीगत तर्फको खुद बजेट ३ अर्ब ४१ करोड ९७ लाख २८ हजार ५ सय ६५ रुपैयाँमध्ये २ अर्ब ७० करोड १३ लाख ७७ हजार २ सय ३२ रुपैया खर्च भएको छ ।

असार मसान्त मात्र १ अर्ब १९ करोड ५८ लाख ६६ हजार ७ सय १३ रुपैया खर्च भएको देखिन्छ । विकास निर्माणतर्फ पुँजीगत खर्च भएकोले बढी बजेट त्यही शिर्षकबाट फ्रिज भएको कोष तथा लेखा नियन्त्रण प्रमुख दाहालले बताउनुभयो ।

उहाँका अनुसार विकास निर्माण कार्य ढिलासुस्ती, समयमा बजेट नआएको र ठेक्का लागेको निर्माण कार्य समेत अलपत्र हुदाँ त्यस्तो शिर्षकको बजेट खर्च हुन सकेन । त्यही रकम फ्रिज हुन गयो, समयमा काम भएको भए रकम फ्रिज हुदैन थियो उहाले भन्नुभयो ।