बनेपा, २४  असार । नेपाल कम्युनिष्ट पार्टीका वरिष्ठ नेता माधवकुमार नेपालले पुरातात्विक महत्वका पुराना मठमन्दिरको संरक्षणमा लाग्नुपर्ने बताउनुभएको छ ।

उग्रचण्डी नाला समाज काठमाडौँले यहाँ आयोजना गरेकोे उग्रचण्डी भगवती मन्दिरलाई सोलार बत्ती तथा सिसी क्यामेरा हस्तान्तरण कार्यक्रममा उहाँले नालामा रहेको उग्रचण्डी भगवतीको मन्दिर ४०० वर्ष पुरानो ऐतिहासिक महत्वको भएको हुँदा नालाबासिन्दा गौरवान्वित हुनुपर्ने बताउनुभयो ।

उहाँले भन्नुभयो, “विदेशमा १०० वर्ष मात्रै पुराना मठमन्दिर पुरातात्विक हुने गर्छ तर यहाँ हाम्रो देशमा सयौँ वर्षको इतिहास बोकेका मठमन्दिर संरक्षणको अभावमा नै रहेकाले त्यसको अब संरक्षण र संबद्र्धन गर्न सबै मिली लाग्न जरुरी छ ।”

पूर्वप्रधानमन्त्री नेपालले नाला पुरानो शहर भएकाले पहिचानलाई जोगाएर राख्न पुरानै शैलीमा पुनःनिर्माण गर्न सुझाव दिनुभयो । “नालाको प्राचीनतालाई जोगाएर राख्न जनप्रतिनिधि र स्थानीय सबै एक भएर लाग्नका लागि आग्रह गर्न चाहन्छु कि यसले नै यहाँको पर्यटकीय विकासमा अरु महत्व राखोस् ।”

सो अवसरमा सञ्चार तथा सूचना प्रविधिमन्त्री गोकुलप्रसाद बाँस्कोटाले नाला क्षेत्र प्राचीन सम्पत्ति भएकाले त्यसलाई थप व्यवस्थित गरेर अगाडि बढ्न सबैमा आग्रह गर्नुभयो ।

बनेपा नगरपालिकाका प्रमुख लक्ष्मी नरसिंह बादेले नगरभित्रका कला, मठमन्दिर र कलात्मक वस्तुको संरक्षणमा आवश्यक सहयोग गर्न तयार रहेको बताउनुभयो ।

उग्रचण्डी नाला समाज, काठमाडौँको आयोजना तथा नेपाल राष्ट्र बैंकको समन्वय र एनआइसी एशिया बैंकको आर्थिक सहयोगमा उग्रचण्डी भगवती मन्दिरमा छवटा सिसी क्यामेरा र छवटा सोलार प्यानल गरी रु आठ लाख बराबरको सामग्री हस्तान्तरण गरियो ।